八方噚日喺灣仔海旁嘅萬麗海景酒店見到眾人媽打李麗娟，佢攞住紮又大又靚嘅花，笑到合唔到嘴，原來噚日係佢牛一，媽打係四九年出生，噚日五十七歲生日，剛好新舊曆重叠。
李麗娟話，噚日有好多嘢值得佢開心，首先係班手袋黨晏晝訂咗圍枱同佢食午飯，個飯局由王䓪鳴做搞手，呢輪日日叫人7.1上街嘅陳太當然有出席，佢同李麗娟情同姊妹，幾忙都要去一去。另外仲有楊永強醫生、梁智鴻夫婦、高永文夫婦以及蘇包陪慶㖭。
媽打話，佢嘅生日願望係WorldPeace（世界和平）。問佢會唔會陪陳太上街，媽打話佢一早答應咗出席由李福逑老先生call嘅一個敍舊活動，去唔到。
李麗娟今年生日最開心係可以同媽媽一齊慶祝，「28年嚟第一次同阿媽喺屋企過生日，仲有家姐、哥哥、乖女同未來女婿。」唔怪得成屋都係笑聲。