今日七月一日，陳太話明上街遊行爭取民主普選，碰啱葉太自史丹福學成歸來，對接機記者講：「民主不靠遊行喊口號。」正好與陳太對着幹。葉太在史丹福大學讀嘅第二個碩士學位，論文題目係HongKong:ACaseStudyinDemocraticDevelopmentinaTransitionalSociety，幾有吸引力，葉太不如做博客，將份論文放入佢自己嘅blog，公諸全世界都好吖。假如葉太肯為香港民主發展而奮鬥，願意明年投身競選特首嘅話，到時或者有三個名人競選，曾特首大戰陳太、葉太。嘩，好睇咯，三人辯論戰一定轟動。
不過，葉太好懂得國情，唔似得陳太，明知北京唔高興都要出聲，要上街。相信葉太會低調工作，默默組班，到了二○一二年，誰與她爭鋒？
陳太上港台做節目，唔覺意又試令港台在特首辦眼中失分，朱處長日子唔會好過，負責天地博客節目嘅張笑容素來硬淨，對新聞原則絕不妥協，係不懂國情之人辦。最新國情係乜呀？根據《國際先驅論壇報》（IHT，六月二十八日）報道，人大正在起草一條法例，嚴控中國傳媒對突發事件嘅新聞報道，突發事件包括疫症、騷動、罷工、重大意外及其他官方唔想宣揚嘅事件。宣傳部會着令報紙、雜誌、新聞網站及電視電台，如果報道未經批准嘅「突發新聞」，會受懲罰。
陳太上電台，上街，對特首辦嚟講，直情係突發事件啦，張笑容與朱處長唔問過就讓陳太發言，呢趟弊咯。一位好懂國情嘅新聞界人士話，港台內其實有一位好識國情嘅人士，朱處長應該視之為軍師，呢位就係最近當選「香港新聞工作者聯會」理事嘅張圭揚博士，呢個會係文匯、大公、商報等愛國報紙編輯發起嘅，立場與記協、新聞行政人員協會呢兩個老牌傳媒工作者團體唔多一樣，政治取向亦唔同。張圭揚入咗呢個以文匯報張國良為主席嘅愛國新聞記者會，你話幾識時務呢，直情係俊傑啦，前程錦繡，特區政府唔怕冇人唔識得接管港台。