銅鑼灣係不夜城，由朝到晚都係車同人，諗得到嘅娛樂、購物、飲食場所，區內都搵得到，加上地鐵、巴士、小巴甚至海底隧道瓣瓣通，所以區內住宅租務好煞食，尤其係鄰近維園一帶中心點嘅舊樓，回報特高，好似樓下係戲院嘅珠城大廈，人流興旺，行去地鐵站唔使3分鐘，呎租企硬20蚊都有大把人接，回報隨時有6、7厘。
珠城大廈已經有36年樓齡，但外觀仍然靚仔，一啲都唔覺老屹屹，樓價仲幾好水位㖭。中原張永泉話，剛啱有個客用300萬元，買咗個B座中高層1室，930呎，呎價3226元，諗住用萬八蚊出租個單位，回報7.2厘。賣家99年用170萬元買返嚟，勁賺130萬元，如果其間佢都係攞嚟收租，呢個投資就真係賺到盡咯。