噚日上晝，廣播道氣壓好低，送走陳太之後，港台上下隱隱然感到有一股殺氣，喺對面海下亞厘畢道中間醞釀，有直撲四台山之勢。港台掌門人朱培慶神色凝重，率領一眾高層閂埋門開會，研究吓日後如何改善「通報機制」，如何更精益求精；而「闖出大禍」嘅張笑容同區麗雅並無在場。據探子消息，朱處長無怪責任何人。
張笑容區麗雅搵定工
呢一場風波，緣自港台一台節目《公民社會》，呢個節目由張笑容同區麗雅負責。今個禮拜佢哋請咗陳太做嘉賓，一連四日喺當中嘅〈天地博客〉環節開咪，講民主普選、講言論自由。雖然只係講三分鐘，但呢啲題材足以令煲呔政府心膽俱裂，更何況時值賈主席南巡，7.1大遊行在即，港台咁做，被認定係搞對抗搞破壞，所以下亞厘畢道嗰邊嬲到震。
據說，〈天地博客〉請陳太開咪一事，朱處長事前並不知情，喺星期一先至有人通知佢，所以佢至要研究改善「通報機制」，好等他日又有同類事件時，自己俾人炒咗都知道為乜。不過，煲呔嗰邊就絕對唔信處長事前唔知情，佢哋咬牙切齒之餘，仲話有人食碗面反碗底。
睇嚟繼審計處大舉進駐，左王虎視眈眈之後，港台肯定會再遭浩劫。八方立此存照，以今日特區政府作風，朱處長執定包袱、張笑容區麗雅搵定工都得。
不過，唔會咁快郁手嘅，事關現在發難，隨時刺激多三幾萬人上街，所以佢哋忍得好辛苦。
咁港台中人點睇呢？佢哋大致分開兩派，一派憂心忡忡，認為陳太利用咗港台，甚至係害咗港台，令呢個風雨飄搖嘅新聞機構陷於死地。但係另一派人就話毫無壓力，佢哋話港台一早已經俾人玩死咗，最多咪畀煲呔鞭屍，仲有乜好怕呢？