回歸周年左派紛紛大排筵席慶祝，呢啲飲宴活動，大有大搞，細有細做，有錢佬喺會展擺幾十圍顯派頭，街坊組織喺屋邨酒樓搞亦唔拘，東九龍居民委員會噚晚就喺黃大仙啟德花園一間火鍋酒家大搞慶回歸聚餐，順便慶祝委員會成立49周年。
呢個會有近半世紀歷史，來頭真係唔簡單。話說1967年暴動，最初係由新蒲崗塑膠花廠工潮而起，自此新蒲崗被視為「解放區」，呢個會正正喺新蒲崗起家，會內骨幹都係根正苗紅人物，因此民建聯東九龍雙陳，陳婉嫻同陳鑑林噚晚均有現身，嫻姐一襲碎花長裙好搶鏡，陳鑑林則同師奶打成一片，非常風騷。八方聽聞，嫻姐最近改變形象，又好似真係有啲唔同。