上輪意大利對澳洲，好彩托迪臨完場生生性性射入12碼，保住唔少人同埋華度個擦鞋仔貼士；嚟緊8強再追呢班意國兵團場次，今次捧好分啲嘅入球「大」。
意大利辛辛苦苦捱過咗澳洲呢關，爭標前景一片光明；因為佢哋執到好籌，對手係8強中無論實力及經驗都較弱嘅烏克蘭，難怪呢幾日喺博彩公司出入，幾乎見到嚟買波嘅，都唔少得繼續追意大利W。
但呢場意大利W又係得嗰1.5倍多啲，我哋亞洲人賭波唔同歐洲佬咁幾熱都撐，人哋捧場係因為對隊波有感情，我哋都係比較實際，關心個荷包多啲。
舒夫真高有力入波
況且上場個意大利1.5幾倍W，真係執番身彩，再嚟就咪搞嘞，始終呢班波今屆贏波場合，都唔算贏得太清脆；而且對面烏克蘭有個舒夫真高，呢位「核彈頭」正如幾位東歐行家話齋，喺AC米蘭已經證明咗，係有辦法及能力撕破意大利人嘅防線。照秤，意大利又冇理由打唔贏烏克蘭，問題只係入到烏克蘭幾多球。華度睇過東尼呢位意大利前鋒，真係幾「弗」，好多波落點明明唔到佢位，都可以畀佢追到，仲嚟個一控一射，估計東尼今場應該係時候開齋。所以，呢場波兩隊嘅失守可能性俱高，開「大」在望。文：華度
採訪隊推介
華度心水：意大利對烏克蘭入球大