記得梁詠琪（GiGi）曾經翻唱過張艾嘉的名曲《愛的代價》，歌詞內有一段是這樣寫「走吧，走吧，人總要學着自己長大。走吧，走吧，人生難免經歷苦痛掙扎。走吧，走吧，為自己的心找一個家，也曾傷心流淚，也曾黯然心碎，這是愛的代價。」與鄭伊健已分手半年的GiGi，日前終於首度開腔回應跟對方的感情事，李宗盛筆下的歌詞，正好活脫脫道出GiGi的心聲。 撰文：馮美茵
2006年3月25日，梁詠琪30歲生日，她沒有前度男友為她登全版廣告賀生日的浪漫驚喜，相反今年的她度過失戀後的第一個單身生日。在剛踏入2006年1月跟拍拖六年多的男友鄭伊健分手的GiGi，一下子變回單身，為避情，她先飛往日本及英國療情傷，讓自己可以舒一口氣尋回自己，回港後即搬離西貢匡湖居的住所，遷往中環，開始了她30歲的獨居生活，為自己寂寥的心靈尋找一個家。
性格不合
經過半年時間療傷，GiGi近日重新投入工作，宣傳即將推出的新唱片，難免要再被掀起這塊剛剛痊癒的瘡疤，對於當日分手，她說：「大家真係聚少離多，好少時間相處，性格不合都係，因為溝通都要時間，拍拖六年，每一年都有二分一時間唔喺香港；另外二分一時間就要去內地同台灣工作，其實大家近一、兩年都知有問題，也曾坐低傾，去到舊年年尾下定決心去做呢件事。」
事業跟愛情從來很難兩者兼得，GiGi坦言就是因為兩者對她而言都重要，故此令她兩方面都兼顧得不全面，對於將來，GiGi說：「將來嘅嘢冇人知件事會點，趁呢一刻我年輕仲有market，仲有工作熱誠同青春，維繫唔到，我都覺可惜，但分手未嘗唔係一件好事，等大家冷靜啲，專心啲。」
由23歲到30歲，一個女人的青春黃金歲月全奉獻給一個男人，究竟是否值得？
「都付出咗，做人唔應該只在乎結局，過程至重要，大家都開心過，無悔㗎喇，冇話值唔值得，𠵱家，嗰段日子成為一個回憶，結局係點都係次要。」
處理失當
「奪麵雙琪」事件令到當年梁詠琪的形象很差，要花上好多工夫，才令下跌的事業返回軌道，談回舊事，GiGi坦言：「冇得怪人哋，當年處理失當，係兩個人都有責任，就算之後引申到所有新聞，自己都要去承受唔公平及被屈嘅新聞，既然控制唔到，惟有處之泰然，做番起自己嘅事業。」覺得當年付出的代價大嗎？GiGi說：「付出嘅代價大㗎，咪由頭嚟過，有啲人有勇氣去跳樓，但冇勇氣去面對件事，我咪攞勇氣去重新投入工作，唔會坐喺度『拚pair』。」
時至今日，梁詠琪的形象並不比當年有改善，今日的結局，她似乎未獲半點同情，周遭的閒言也是「抵佢死啦……都話唔睇好佢哋」等等諸如此類說話，問GiGi可覺得難受？「當初處理得唔好，令人有先入為主嘅印象，但感情係兩個人嘅事，報道入面有唔知百分之幾係真，好大程度好多都係唔真實，我一路冇否認，只係怪當初嘅處理唔好，至俾人有機會去寫，亦冇怪傳媒，換過個角度，惟有安慰自己仲有新聞價值。」
過新生活
要走出一段六年的感情的確不易，當中令GiGi學習到日後要自己保護自己，她說：「以前我係一個好易去相信人嘅人，覺得個個都信得過，肆無忌憚表現真性情，但發生了一連串事件後，我明白責任喺自己度，唔能夠怪人哋，但防人之心不可無，自己有責任去保護自己，唔好奢望身邊人會保護你。」
一對分了手的情侶，彷彿仍有一條無形的線將兩人綑綁着，雖然沒有了戀人的名份，但仍保持着戀人的觸覺，當坊間正不斷吹噓及期待鄭伊健跟邵美琪復合的新聞湧出來時，永遠背着鄭伊健名字包袱的GiGi說：「分咗手都係朋友，一個普通朋友拍拖都係一件開心嘅事，我會當佢係一個普通朋友祝福佢，佢同邊個一齊，都會尊重佢嘅決定，因為係值得開心嘅事。」還有跟對方聯絡嗎？她笑說：「少喇，因為我開始過新生活嘛。」
拍拖隨緣
積極為自己人生揭開新的一頁，要活得比對方幸福，才是當下最重要的事，GiGi表示很享受目前單身貴族的生活，她說：「我幾鍾意𠵱家自己有獨處嘅時間，會喺屋企睇書，又會執吓屋，亦有識到新朋友，都有人約會吓。」那麼對愛情可有陰影？GiGi笑說：「兩個字啦，隨緣，可能突然緣份到，又或有個好夾嘅人出現，但如果真係要拍拖，都應該係兩、三年後嘅事。」
7月梁詠琪會推出新專輯，作為她出唱片10年的一個總結回顧，專輯名字叫《成長的短髮》，眼前的梁詠琪仍然束着短髮，但當事人的心經已翻過千浪，惟有抹乾眼淚重新振作，才對得起身邊愛惜自己的朋友。
攝影：仇志德 化妝提供：Yan
髮型提供：Piusof04Orient4
服裝提供：MarcbyMarcJacobs
場地提供：thequarterdeckclub
