德國最出名係啤酒，有線直擊隊早前喺慕尼黑採訪，就曾經到過當地嘅beergarden，試過慕尼黑品味嘅黑啤酒，味道相當唔錯。
鍾情自己地區啤酒
德國人對啤酒好講究，可以話每個地區都有自己嘅啤酒口味，要試晒全部嘅德國啤酒，可以要花成個月時間都未夠。德國人對啤酒另一種睇法就係好主觀，佢哋只會認為自己地區出產嘅啤酒先係最好，絕對唔似香港人嗰種「隔籬飯香啲」嘅感覺。
以今屆世界盃為例，國際足協同一間美國啤酒商簽咗合約，所有由主辦機構搞嘅活動，包括比賽、場外大電視等，都由呢個合作夥伴提供啤酒，所以一班東道主球迷飲嘅時候都冇咁暢快。
德國人除咗討厭美國啤酒之外，原來佢哋對其他國外品牌嘅啤酒都冇咩好感。好似英國生產嘅啤酒，就似乎唔合佢哋胃口嘞！英格蘭早前對厄瓜多爾嘅1場16強淘汰賽，球星碧咸喺比賽時曾經嘔吐，德國球迷就覺得係碧咸飲得英國啤酒多，所以踢波先至會嘔，仲話如果佢飲嘅係德國啤酒就應該冇問題咁話喎！不過班球迷都係講笑啫，嗰日碧咸嘔其實喺佢唔舒服之嘛！
講番間beergarden，其實佢係1間啤酒生產廠同餐廳嘅混合版，入場嘅客人除咗可以觀賞吓garden入面嘅設施外，當然亦可以喺間餐廳歎番杯啤酒，肚餓時又叫多碟鹹豬手或德國大肉腸，你話幾享受呢。
有線06世界盃嘉年華，將於今晚11:30pm--午夜1:30am，播出世界盃外景隊採訪滙報