近排因為巴士阿叔條片，令到個個開口埋口都話「你有壓力，我有壓力」，搞到香港成為壓力城市咁滯！計我話，𠵱家喺德國班教練先至最大壓力，𠵱家打淘汰賽，一場定生死喎！食粥食飯都係靠晒班球員，贏嘅話，個教頭仲有得留低，輸咗不單飯碗不保，仲要俾人用掃把烹走！教練做到咁，都真係幾無癮。
好似烏克蘭對瑞士嗰場咁，雙方踢完120分鐘都係打和，要以12碼分勝負，烏克蘭教頭布洛堅驚到匿埋更衣室唔敢睇，可想而知呢班教頭壓力非同小可。
講真，有時踢咗幾輪都分唔到勝負，年事已高嘅教練真係會頂唔順，分分鐘搞到心臟病發。所以，我認為不如以包剪槌一盤定生死，唔使班教頭擔驚受怕咁耐仲好啦！
彭浩翔
電影導演