劉德華昨日綵排回歸騷時，談及演藝學院頒發榮譽院士給他，他表示已通知雙親，感覺就像讀書考三甲般興奮，並即場餵眾歌手吃燒肉，十分風騷。
劉德華、陳奕迅（Eason）、容祖兒和何韻詩等歌手昨日在紅館綵排回歸騷和出席拜神儀式。儀式完畢後，華仔逐個歌手餵吃燒豬皮，十分風騷。至於曾傳緋聞的祖兒和何韻詩因為不同時間到場，所以未有機會一同拜神。
Eason責抵鬧
華仔日前獲香港演藝學院頒授榮譽院士，表揚他在演藝界的貢獻，祖兒甫見華仔即恭喜他。華仔透露父母雖不在港，但已通知了他們，他說：「變咗好似係我讀緊書考試入三甲，叫我繼續畀心機喎，佢哋又問我拎乜嘢院士。」有記者問他可感到獎項遲來了？華仔笑說：「聽講我算係後生㗎，之前發哥（周潤發）、仙姐（白雪仙）已經攞咗，秋生同我同年，佢就上年得獎，算係最後生嗰個。」
另外，Eason拜神時誠心地九十度鞠躬，事後還拿着印有表演歌手相片的場刊，到處向歌手索取簽名。談到太太徐濠縈被拍到與其他男性出街的照片，Eason表示訓練EQ不作回應，他說：「我做得呢行冇辦法，呢啲係私隱問題，唔好騷擾朋友，佢真係好無辜，可能佢唔想同全香港人分享佢嘅身世，我唔想回應，費事益佢哋。佢哋點挑釁我，如果答就佢哋贏囉。𠵱家個風氣愈來愈差，令人勞氣呀，好似上次十四歲濕身影相嗰件事，文化又低咗。
「我哋回歸祖國九年，應該要自豪，做嘢要認真啲，好似綵排咪記清楚做乜，唔使到時睇大字報，又問有冇大電視睇歌詞，以前我都試過，係抵鬧嘅。」
演唱會靈藥
至於祖兒，她將於8月5日舉行「新城容祖兒舞動狂熱音樂派對」，8,000張門券於八小時內掃清，祖兒覺得反應熱烈是因為嘉賓羅志祥（小豬）甚少在香港開騷，不過她笑言自己雖然是演唱會售票靈藥，但卻是電影票房毒藥。
採訪：王連連
攝影：陳俊強
