早排盛傳搭上「殼王」陳國強、獲對方投資開戲做女主角嘅郭羨妮，前晚去咗赤柱擔任保時捷跑車活動嘅司儀賺外快，佢狂讚現場嘅跑車超靚，馮仁昭同佢講笑話，鍾意咪搵人送囉，點知郭羨妮懶有一番見解咁話：「我唔會搵人送，係都努力賺錢買，人哋送，收都未必開心，我唔係咁容易收人禮物嘅。」
冷對登報賀壽
再問郭羨妮如果個追求者揸架跑車，咪零舍有型兼浪漫？佢就話：「我揀男友唔係淨係睇呢樣嘅，揸跑車梗係有分加，不過都要睇內涵。」問佢內涵嘅定義係家財千萬定飽讀詩書呢？郭羨妮答：「係要真心真意同埋要係一個好人。」至於早前大劉劉鑾雄豪擲20多萬登報賀李嘉欣生日，呢個動作又𠱁唔𠱁到佢呢？郭羨妮話：「我會冇乜反應，鍾意一個人咪鍾意囉，唔一定要用呢啲方式。」
