李樂詩近日忙於籌備首張國語大碟，自行製作唱片的她更因太投入工作而導致壓力爆燈，經常發脾氣，只有靠猛吃朱古力和歎Spa減壓。
李樂詩最近忙於製作其首張國語大碟，不過因為自己成立公司製作唱片，要兼顧太多不同工作而情緒失控。李樂詩日前接受訪問時，就顯得精神不足，她說：「我咁多年嚟都未試過有咁大壓力，可能係因為𠵱家冇公司backup啦，又因為多咗好多製作上嘅嘢要兼顧。」
冷落男友
李樂詩續說：「以前淨係負責唱就OK，𠵱家多咗好多人事嘅嘢啦，又多咗好多交際，我忙到成日都想喊同谷住谷住，所以有時助手同工作人員都會變咗發洩工具。」問到可有向男友杜德智傾訴，李樂詩只淡然地說：「佢都好忙，我又唔想負面情緒影響到大家，所以想盡量自己解決，呢排我脾氣唔好，所以都冇搵佢住。」
重現笑靨
排山倒海的工作令李樂詩受壓，彈琴作曲都會使背部疼痛不已，所以她會盡量抽時間做運動減壓，或做Spa放鬆心情。訪問當日，李樂詩一拍完照即急不及待更衣做Spa，重現往日常見的笑容，她笑說：「我仲會暴食嚟減壓，最鍾意就係狂食朱古力，食完個人即刻開心啲，不過我個stylist就好頭痛喇。」
採訪、攝影：藍文浩
服裝：ING
形象：AndyDaniel
髮型：Tavin@HairCultural
場地：NaturalBeauty&SpaCentre
