通常藝人的第二代想加入娛樂圈，承受的壓力均比一般新人大。假若其父母在娛樂圈成就非凡，他們要付出的努力相對地更大，近日以搖滾樂殺入樂壇的歌神許冠傑之子許懷欣，定然十分明白這個道理。
歌神許冠傑（Sam）的兒子許懷欣於本月尾即將推出首張EP，裏面創作的歌曲大都是搖滾類型，對於首張唱片便捨棄商業味較重的歌曲，懷欣並不擔心，他說：「我自己好鍾意rock嘅音樂，我加入樂壇係想做一啲自己鍾意嘅音樂，當然我唔係話商業歌曲唔好。」
唔係睇我扮阿Sam
由於阿Sam於樂壇地位崇高，懷欣當然背負着一定的壓力，他說：「我爸爸係阿Sam我當然有壓力啦，但係如果我唱歌係copy佢嘅歌路、佢嘅唱法，我係唔會成功㗎，因為阿Sam就係阿Sam，冇人可以取代佢，鍾意我嘅人唔係要睇我扮阿Sam，而係鍾意我嘅音樂。」
板仔老師教中文
由於懷欣於14歲便到美國留學，他笑言中文只有小學程度，這個問題也成為他唱中文歌要面對的障礙之一。所以懷欣於創作過程中需要別人為他繙譯中文歌詞。
懷欣還有一個特別的方法進修中文，就是他身邊的一班「板仔」中文老師，他笑說：「我好多玩滑板嘅朋友都係喺我去美國讀書前識嘅，今次我返嚟香港發展都有搵番佢哋，咁每次出去踩板就會同佢哋講中文，我仲會睇港產片學中文㖭。」
採訪：李珮洳
攝影：陳慧安
化妝：JaniceFungofSelfImage
髮型：Vic,PinkyofHairCulture
服裝提供：DoublePark,Knowledge
場地提供：HitStudio
