踏入淘汰賽階段，有玩開大細嘅波友，都發現16強頭6場開細。不過到最後一日，就嚟個大逆轉，連開2口大；巴西開大就唔出奇，西班牙對法國又開大兼有4個入球，就有啲冷味喇。
到底條入球大路會唔會延續呢？小弟認為頭場德國對阿根廷會開多口大先；其實睇番16強賽事，德國同阿根廷兩場賽事，都係開波十零分鐘，已經炮製兩個入球，結果都可以頂到尾，兩口細開得好絕。講真，德國同阿根廷攻力唔使點懷疑；德國教練奇連士文依靠主場之利，一開波就搶攻，用活力同壓迫力搶亂對手，希望博到一兩個入球，穩定軍心；從幾場比賽，呢招都幾高明。
不過阿根廷又豈會坐以待斃，論腳法，阿根廷肯定係德國之上；而且陣中有好多「老鼠仔」型球員，好似沙維奧拿、美斯咁，喺德國後防班高佬中間穿梭，真係令佢哋頭都大埋。德國近3場冇失波，其實只係假象，一來波蘭同厄瓜多爾攻力平平，瑞典又只因前鋒軒歷拿臣射失12碼，德國先可以保不失；既然雙方都入得又失得，2.13倍入球大真係好值博。
舒夫真高無懼意後衞
尾場意大利對烏克蘭，意軍讓到半/一，真係好盡；睇形勢似和，不過意大利又有運，隨時又贏一粒收工，上下盤唔算好賭，反而可以再追入球大。記得烏克蘭第一仗對住攻擊速度快嘅西班牙，真係抵擋唔住，結果輸夠4粒；意大利又係擅長打反擊，派路一個長傳，東尼同基拿甸奴壓入禁區，以烏克蘭後衞嘅級數，真係頂唔住。不過烏軍前鋒舒夫真高，意甲打滾咁多年，又點會怕班意大利守衞，既然入到8強已經超額完成，梗係博多一個入波得一個，2.72倍大，可以串埋。
文：牽牛