8強大戰前夕，國際足協公布了12名球證「生還者」，並委派了4名執法8強嘅主球證；但最令人覺得冇解嘅係，英格蘭嗰場竟然由阿根廷球證處理！
國際足協星期三公布咗12名繼續有機會喺世盃執法嘅判官，當中較具名氣有德國嘅梅克、意大利球證羅錫迪等；同時，4名將於8強「吹雞」嘅主球證亦揭曉：阿根廷對德國會由斯洛伐克嘅米歇爾處理；意大利對烏克蘭則由比利時嘅迪比基執法；英格蘭對葡萄牙一役就由阿根廷嘅伊利桑度執法；巴西對法國由西班牙嘅麥甸拿處理。
據聞今屆世盃球證人工每人有成3萬幾歐元（約30多萬港元），但佢哋交出呢啲水準，其實幾抵炳；但判官諗唔明，連阿水都知阿根廷同英格蘭係牙齒印極深嘅對頭，點解英格蘭嗰場波會由阿根廷球證吹雞呢？另外，法國喺16強淘汰咗西班牙出局，但偏偏就揀個西班牙球證去執法，究竟佢哋係想整蠱個球證，定係想製造新聞話題呀？
判官話
國際足協都知今屆球證俾人鬧到飛起，仲派啲嫌疑犯去吹雞，似玩嘢多啲喎，我覺得佢哋做得好錯！
爭議指數：★★★★
註：以5★為最高
專家話：編排上絕對失策
「阿根廷同英格蘭向來都唔啱，國際足協冇理由唔知道，但仍然編排一個阿根廷球證做英格蘭對葡萄牙嘅8強，賽前賽後都會惹來好多談論，編排上絕對失策。」
陳譚新(國際足協裁判導師)
網民反應：黑箱作業冇嘢講
外界對國際足協在球證問題上的處理手法有何看法呢？「黑箱作業，我哋邊有嘢講啫！」「咁啱啫，冇事都講到有事啦。」「勁嘅球證都係來自勁嘅聯賽，避無可避！」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534