侍仔：今晚終於有8強睇啦，德國對阿根廷，馬會開平手盤，畀我就揀阿根廷喇，話晒球員整體質素比德國好。
菠蘿文：德國有主場，個球場有成7萬個德國球迷打氣，話唔定好似墨西哥上場咁，一開波就同阿根廷鬥搶。
招積域：前一晚聽阿根廷個史卡朗尼話德國咁嘅踢法正中下懷喎，德國雖然自從首戰之後就無失過波，但對住阿根廷，失兩球已經係水準嘅表現啦。
侍仔：德國雙塔後衞咁高，阿根廷前鋒會唔會唔夠佢哋頂㗎？好似得基斯普高些少，其他都係亞洲人咁嘅身形。
戴維斯：你要沙維奧拿同梅迪薩卡講手就一定輸啦，但𠵱家係踢波，只要阿根廷照番一貫戰術，要贏德國定過抬油。德國後防今場有真正考驗，等阿根廷話畀佢哋知咩係進攻足球。
侍仔：我鍾意阿根廷，但如果德國輸波，高路斯神射手就玩完。今朝睇報紙見到佢嘅賠率跌到得番2.5倍，都係唔再入貨啦，個賠率有古怪，好似睇好德國贏阿根廷咁。
侍仔：另一場意大利對烏克蘭，唔知意大利會唔會符碌入到4強呢？始終佢哋16強贏澳洲真係靠運。
意大利靠符碌入4強？
招積域：贏烏克蘭就真係有難度，馬特拉斯同尼斯達，都因停賽及受傷唔可以上陣，即係意大利無咗兩個中堅用。
菠蘿文：其實烏克蘭到目前仲未適應德國天氣，所以踢唔出應有水準。意大利仲有個巴沙利可用，要守一隊無態嘅烏克蘭冇問題，要贏就有啲保留，烏軍受讓半/一，下盤可期。
文：高洛文