德國喺分組賽嘅表現愈踢愈好，除咗揭幕戰失過兩球畀哥斯達黎加外，其餘3場對住波蘭、厄瓜多爾同瑞典都冇失過波，呢點證實佢哋響防守方面，有好大嘅改善。講到攻力就更加唔使懷疑，普多斯基同高路斯狀態大勇，兩人合共入咗7球，高路斯更加以4球暫列神射手榜首。
主場因素捧東道主
阿根廷喺頭兩場分組賽就係威係勢，先後擊敗科特迪瓦同塞黑，不過一對住實力有番咁上下嘅荷蘭，就和波收場，上場對住墨西哥都要去到加時階段，先至贏波晉級。基斯普同麥斯洛迪古斯狀態唔錯，各有3球進賬，仲有機會挑戰高路斯神射手寶座，講真呢場的確係一場五五波，不過德國有主場之利，仍值得睇高一線，所以今場揀讓球主勝。
烏隊欠經驗稍吃虧
另一場心水推介係意大利對烏克蘭，上場波意大利驚濤駭浪下，憑一個問題12碼死裏逃生，今次對另一支決賽周新丁烏克蘭，將會受到另一次考驗。今場意大利後衞馬達拉斯停賽，尼斯達可能唔出得，對防守力有好大影響。面對烏克蘭快速反擊，上半場要特別小心。不過到8強階段，球隊經驗係好緊要，意大利畢竟大賽經驗較為豐富，小勝相信冇問題，所以呢場揀主客和嘅主勝。
陳樹鵬（阿鵬）
有線球彩台主持
電郵：[email protected]