綽號「重炮」的林尚義（阿叔）前晚主持無綫世界盃節目時，忽然胡亂發炮，先嘲笑伍晃榮執筆寫心聲的片段似在跳樓前寫遺囑，其後更指今屆世界盃球證應往驗尿，因為似食了藥「忽忽哋」。不知是否因死敵李克勤請假不在場，令本來鬱鬱寡歡的阿叔忽然生猛晒，可惜言論似乎過了火位。
無綫今年的世界盃節目只是播隔夜波精華片段，仍然成為城中熱話，68歲的林尚義（阿叔）更成為是非暴風的中心，先被指遭「外行人」李克勤以每日500元賤價，奪去其負責控制節目流程的重要位置；又有謂伍晃榮的私人showtime《伍晃榮日誌》環節搶盡風頭，令阿叔大為不滿。事實上阿叔自世盃節目開播以來，一直狀態低迷，經常低下頭沉默不語。
宿敵反嘲
陳譚新：阿叔應驗尿
但克勤自本周日向無綫請假往德國睇波後，阿叔忽然變得龍精虎猛，連林敏驄早前接受訪問時也直指阿叔恍如初戀般如沐春風。前晚阿叔主持節目時更忽變開籠雀，當《伍晃榮日誌》環節播完後，阿叔即嘲笑伍晃榮說：「我滿意個古仔內容，但唔滿意佢次次都係喺天台影住個背脊，搵第二個景唔得咩？仲有拎住支筆同個板好似睇唔開寫遺囑要跳樓咁。」另一主持人錢嘉樂聞言即大叫：「阿叔返嚟喇。」伍晃榮則以笑遮窘，說：「退休嘅人係咁㗎喇，所以叫你唔好退休囉。」
另一方面，今屆世界盃球證執法爭議極多，在荷蘭對葡萄牙的十六強賽事中，俄羅斯球證艾雲諾夫發出4紅16黃牌，是世盃史上最多紅黃牌紀錄的賽事，而意大利對澳洲的賽事中，西班牙球證麥甸拿竟在完場前補時階段，判給意大利一個具爭議性的12碼，令澳洲輸0:1出局，賽果備受爭議，引來球迷詬病。
阿叔對球證的判決也深感不忿，他前晚在節目上問嘉賓、亞洲足協裁判導師陳蔭明：「世界盃啲球證做完有冇去驗尿？」陳蔭明反問為何要驗尿時，阿叔說：「點知有冇食過藥，忽忽哋㗎，食咗藥咪忽忽哋，啲球員都去驗尿啦，點知有冇啪過嘢。」說時更做出食藥手勢，言論似有點過火。
對於阿叔叫球證驗尿的言論，82年成為首位世界盃華人球證、現役國際球證監督的陳譚新昨在電話中笑說：「應該叫阿叔去驗尿至啱！我𠵱家幫緊廣東電視台講世界盃，聽到人講話佢做節目好興奮，可能佢就嚟退休，所以心情特別興奮啦！驗尿係因為球員表現興奮先至要驗，佢係咪要去驗吓？我估佢都係講吓笑嘅啫，我覺得今屆世界盃班球證全部好正常。」
失憶反口
林敏驄：我從今封口
事實上，陳譚新是阿叔的宿敵，二人早年合作講波時已被傳口和心不和，有次陳譚新指球證有壓力時，阿叔即時扯火說：「承受唔到壓力就唔好做球證。」
此外，林敏驄早前指阿叔在克勤請假前，曾在節目中剪指甲，令阿叔大動肝火，前晚他錄影無綫節目《心大心細》時，忽然失憶兼反口說：「邊有呀？我冇講過，我從今日開始封口，世界盃咁多是非，我都唔想講，分明係你哋撩啦，唔講喇，唔講喇。」李克勤昨午約12時現身機場，往德國睇波的他說：「會睇德國同英格蘭兩場，之後趕返港做節目。」當記者一提林敏驄的名字時，克勤即時窒一窒，隨即說：「唔好意思。」
至於黃貫中（Paul）前晚在會展演出，在現場播放的短片中，阿Paul指林尚義很hardcore（強硬），事後阿Paul說：「佢個人好堅持己見，堅持到有啲噚、有啲火羅，好hardcore。佢雖然𤓓同埋噚，但我好欣賞佢有方向，揸住自己宗旨，我好欣賞佢㗎。」
採訪、攝影：李珮洳、卓美娟、王崇穎
