無綫為賀阿叔林尚義榮休，昨日安排100名fans和阿叔聚會，由世界妹陳文靜陪同出場的阿叔原本極之風騷，卻因為林敏驄日前的言論，令到阿叔於現場大動肝火，最後主持完開球禮後即坐在一旁煲煙，顯得餘怒未消。
林尚義（阿叔）縱橫球壇數十載，加入無綫已有16年的光景，今年68歲的他主持完今屆世界盃後，便正式榮休，阿叔昨日聯同伍晃榮於尖沙嘴出席「2006世界盃為阿叔喝采真情聚會」，現場安排了100名fans撐阿叔。
獨坐一角煲煙
阿叔昨日由世界妹陳文靜陪同進場，一見fans即不停揮手，狀甚風騷，反觀伍晃榮與世界妹孫慧雪結伴進場則未有如此興奮，四人在台上進行開球禮，之後便播出本屆分組賽事的精采入球片段，而阿叔理應返回第一行的嘉賓席，不過似被是非困擾的阿叔卻坐在一旁悶悶不樂地煲煙，世界妹陳文靜則十分識趣地陪着阿叔。
今屆無綫的世界盃節目只播精華片段都鬧得滿城風雨，連阿叔昨日在聚會上被問到主持最後一屆世界盃可有難忘感受，他也直認不諱說：「梗係難忘啦，咁多是非。」
至於日前林敏驄表示當克勤暫別世界盃節目，阿叔主持時即表現得十分風騷，更直指他恍談初戀般如沐春風，阿叔被問及此事，反應頗大說：「又初戀，好吖，講嘢人人有權講嘢，講嘅嘢都不着邊際，鍾意點寫就點寫。」
「非人生活就完」
此外，林敏驄又指阿叔在主持phonein時都搶答，平時只是剪指甲，阿叔聞言即時有點扯火說：「邊有剪指甲啫，做節目邊有指甲鉗，你話會唔會有呢啲事？」問他是否被林敏驄的言論辣㷫，他說：「唔㷫，㷫得幾多吖，巴士阿叔都未㷫啦，呢啲小意思，噚晚睇波睇到五點幾，瞓到今日兩點幾至起身，簡直係非人生活，不過就完啦，重有幾場波。」
至於伍晃榮被問到昔日報道體育新聞跟現時主持世界盃節目有甚麼不同之處？他笑說：「以前做記者係正襟危坐，𠵱家係講廢話居多，有嗰句講嗰句。」
採訪：卓美娟
攝影：林德雄
