尖沙嘴凱旋門嘅無敵維港海景，有人鍾意到寧願丟空買咗嘅園景單位，每個月畀4.5萬蚊去租個海景戶。
利嘉閣姚偉基話，朝日閣中層A室，1260方呎，啱啱以呎租35.7蚊租出，成為凱旋門首個租出嘅海景單位，相信會成為日後嘅指標。
租客本身買咗凱旋門園景單位，但係睇過現樓之後，鍾意海景多啲，於是即時搵租盤，成為首批租客，8月1號就起租嘞。至於買落嘅園景戶，暫時未有打算，或者稍後先至放租。
個海景戶業主喺舊年以1757.5萬買入，計落租金回報率有成3.1厘，以入伙新盤嚟講都算唔錯啦，呢名業主同個租客一樣，又係自己有樓唔住租畀人，𠵱家租緊擎天半島單位，呢對業主同租客喺呢方面都幾夾，唔怪之得一拍即合。
講開凱旋門，香港置業倪永佳話，有個持有兩個細單位嘅業主，近期一次過賣晒兩伙，觀星閣低層F同G室，面積分別562及558呎，成交價都係470萬，平均呎價8400蚊左右，佢舊年4月以936.87萬買入，賺幾萬蚊，不過就要蝕交易成本。
電郵地址：[email protected]