間間銀行為咗爭生意，都出盡力搶「貴客」，交通銀行喺香港就有「通達理財」中心，專門招呼資產值80萬港銀以上嘅大客，成績做得幾好，上個月佢哋反攻內地，喺上海、北京、南京及廣州等地，用「沃德財富」呢個名，一開就開咗5間中心（上海2間），入場要求低少少，有50萬人仔就得。
交行話，副行長葉廸奇係成個項目嘅總指揮，由選址、裝修、室內設計、監督工程、推廣宣傳，全部親力親為跟到足，畀咗唔少意見，搞咗咁耐落咗咁多心血，佢直頭當個項目係「仔」一樣，家吓個仔終於出世，做老竇嘅葉廸奇終於飲得杯落。
長駐上海嘅葉廸奇，係百分百香港仔，細個喺大角嘴讀書，最鍾意揸飛機，做過飛行服務隊，千禧年攞咗個銅紫荊；北上借調交銀之後，只係間中返吓香港，交銀話「沃德財富」會不停咁開，做總指揮嘅葉副總有排忙。