辣椒仔愛食辣，仲犯賤到特登夾正天時暑熱先嚟食辣，話辣上加辣食到大汗叠細汗先有Feel，兼可以排清毒素身體好喎。呢日佢約埋黃椒、綠椒、紅椒、細椒等大班好友殺落觀塘掃辣菜，當中一味辣子地獄蟹辣到飛天，連身為辣椒嘅佢哋都頂唔順，你又夠唔夠薑試試？
記者：李潔盈
攝影：何家亮
模特兒：Kevin、Tania（Salvador）
辣子地獄蟹每隻$88起
辣椒仔：「我喉嚨真係辣到好似地獄咁呀，雖然好辣，不過食到蟹嘅鮮甜。」黃椒：「梗係喇，師傅揀12至14両肉蟹，加勁多指天椒碎同各式香草，真係辣到我都頂唔順，我暈啦。」
嚇鬼地獄系列
眾椒先踩上「新南苑海鮮酒家」，辣椒仔一見到「地獄」系列美食就猛話要挑戰，主廚王師傅提醒：「唔食得辣唔好嗌，盞你求生不得求死不能。講明呀，個地獄蟹好激㗎，正宗避風塘做法，加晒蒜粒、四川指天椒乾呢類東南亞同中國香草，辣到飛天唔係人人都食得落。」辣椒仔一聽就火：「起個乜鬼『地獄』咁嘅朵就嚇倒我？我身為一隻辣椒，辣嘢會難倒我？」身旁黃椒勸佢唔掂，反而被迫一齊試食，結果雙雙中招……
Extra醬爆雞煲$55
綠椒：「Extra醬其實用XO醬做基礎，經師傅精心改良，辣得嚟仲香過XO醬好多㖭呀。雞肉唔單止夠腍，仲有藥材香㖭，不過點解食到有啲暈陀陀嘅……」
辣椒仔：「梗係啦，除咗藥材，個醬仲加入大量酒，唔醉有鬼咯。」
椒膏炒蜆$42
紅椒：「呢味炒蜆賣相紅卜卜，似足我咁嬌艷。我問過王師傅嘞，原來佢用冬蔭、茄汁、金不換、柱侯等多種香料做成辣椒膏，食落唔太辣又帶有茄香，絕對係送飯佳品，小二，畀多個靚仔吖唔該！」
辣子香酥骨$55
一眾細椒：「嘩，你哋睇吓，成碟香酥骨鋪滿四川指天椒乾同香蒜粒，一望就知辣到無倫啦！」「辣就一定啦，不過大廚精選靚腩排做香酥骨，肉質唔韌有嚼勁，索落超香仲可以𦧲吓骨，辣到躀低都抵啦。」
秘製蜜椒牛尾煲$58
黃椒：「賣相就唔錯嘞，不過講真，用蜜糖黑椒整呢個煲，辣極都有限啦！不過我反而最Buy呢個煲喎，牛尾用紅酒燜到入晒味，再加蜜糖黑椒逼出牛尾鮮味，食落有辣香，咬落甜甜地，啱晒唔食得太辣又想刺激吓味蕾嘅女生。」
食客有Say
搵食攻略
d.新南苑海鮮飯店（21913192）
地址：觀塘仁愛圍19-23號地舖
營業時間：通宵營業
交通：觀塘地鐵站A1出口，步行3分鐘直達
座位：120個，星期五至日7:00pm至10:00pm例爆場
人均消費：$40-$50
最好賣：炒蜆，吊燒骨
連蔡瀾都讚好
辣椒仔同一眾細椒成班友辣到趴地，黃椒紅椒呢對為食情侶趁機閃去「華苑印尼餐廳」，過二人世界兼歎連蔡瀾都讚好嘅正宗印尼辣菜。食物上枱，紅椒皺眉話：「啲賣相真係……」黃椒安撫：「賣相係就係差啲，不過碟碟都落足心機煮㗎。」店主黃氏夫婦係印尼華僑，80年代開始做工廠區印尼餐外賣，到𠵱家開地舖足足13年，當年嘅工廠區舊客一家大細追隨至今，咁溫馨，黃椒都深情款款話：「咁好味，第日同你有咗仔女，照幫襯。」
巴東牛肉$50
紅椒：「Honey呀，巴東係乜東東呀？」黃椒：「巴東係印尼蘇門答臘一個城市，最出名就係呢碟牛肉啦。店主選用靚牛𦟌，加埋指天椒、石栗子、檸檬葉等多種香料落鑊炒，之後加椰汁等燜到乾身，製法正宗，牛肉入口軟腍腍，咁好味食多件吖。」
峇里辣雞$50
紅椒：「又雞？有乜特別呀？」黃椒：「特別在勁花時間囉！首先要醃好隻雞，再炸一炸，然後加指天椒、南薑等十幾種香料一齊燜到夠辣為止，少啲耐性都整唔掂呀。」
香辣雜菜$39
紅椒：「食咁多肉，係時候食番啲蔬菜，咪睇香辣雜菜呢個菜名改得咁Hea，查實用咗合掌瓜、玉豆、香豆等多款特色蔬菜再加蝦膏同蝦一齊煮，蔬菜有海鮮香好入味㗎。」
印尼必用香料石栗子
學嘢時間到！黃先生話：「印尼菜可以細分成巴東菜、爪哇菜、峇里菜等地方菜，不過大家用嘅香料差唔多，香茅、蒜頭、指天椒、南薑、石栗子等等香料必用，只係落料嘅先後次序同份量有分別。石栗子外表白雪雪，比一般栗子為小，從中醫藥角度睇，石栗子具清熱通經的功效，不過唔可以生食㗎。」
搵食攻略
e.華苑印尼餐廳（23427740）
地址：觀塘物華街4A地下
營業時間：11:30am-10:30pm
交通：觀塘地鐵站A1出口，步行約3分鐘
座位：28個
人均消費：$40-50
最好賣：巴東牛肉、香蕉葉燒魚
