一場好波需要好球員同好教練外，仲要有一名好球證。今屆決賽周球證一路俾人插，前晚法國對西班牙場波就精采非常，意大利球證羅錫迪居功至偉，其他決賽周球證真係要學嘢喇！
不愧係光頭佬球證哥連拿同鄉，羅錫迪今場波眼明雞快，除咗睇到杜林踢柏保路伊賓尼斯，判罰12碼外，成場波淨係派咗4張黃牌啫，梗係喇！好似之前球證咁，咩都依球例判罰就死得喇！大家睇吓前晚場波幾流暢？兩隊互攻，睇到判官上氣接唔到下氣。
講番轉頭，呢個羅錫迪原本冇份執法今屆世界盃，多得希臘球證華沙拉斯過唔到體測，羅錫迪先有得執二攤補上。意大利球壇醜聞連連，羅錫迪呢次執法咁出色，唔多唔少為意大利爭番啲面子。
有望吹世盃決賽
上屆世盃決賽由哥連拿執法，今屆會唔會由羅錫迪執法呢？睇整體球證表現，羅錫迪確係最有資格同能力喇！之不過，如果意大利入決賽就當然唔可以由佢執法，意大利躉心情好矛盾啫！
專家話：跟波夠貼明察秋毫
「意大利籍球證羅錫迪今場執法不俗，他勤於跑動，與球賽的事發地點相距接近，故能對球員細微犯規明察秋毫，法國第一球被罰的12碼就是一例。」
何輝（廣東體育台嘉賓主持）
網民反應：咁先至係好球證
網民點睇羅錫迪表現呢？「咁先係好球證嘛！盡量畀場上球員發揮，郁啲就吹停畀牌，搞到場上攻守節奏慢晒落嚟，你估我哋捱夜睇波為睇你咩！？」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534