侍仔：8強戰聽日開波，諗番吓，今屆16強都幾好睇，有幾支球迷唔多認識嘅球隊都交到貨。
菠蘿文：最好睇係澳洲對意大利，袋鼠仔未驚過。如果卡希爾高番幾吋，有兩個頭球就可以頂入。但打多個竟然冇着數，都係踢得太保守。
招積域：澳洲都算係咁，初時無人諗過佢哋入到16強。多啲新球隊入次圈係好事嚟㗎！等班球迷擴闊一下眼界，知道瑞士同澳洲係咩嘢水準，咪成日淨係識英格蘭同法國！真係唔識睇！
菠蘿文：唔好咁躁住，識睇波就自然識分好壞。世界盃初哥唔代表冇水準，沙地踢過咁多次，咪又係咁水皮！睇落澳洲都會係亞洲新霸主，日、韓要讓位啦！
捧冷門亂嗌好危險
筷子毅：有澳洲喺度，中國踢世盃又變成一個夢……
侍仔：筷子，你喺上面踢過，唔係唔知大陸波好多假嘢啦！仲有呀，班球員細個喺咩鬼士倫盃、世青賽踢到識飛，但大個就沉晒。杜威、曲波呢類02年踢得唔錯嘅，𠵱家竟然無晒影！大佬，24、5歲就沉咗，仲邊度有希望？你數唔數得出有邊個02年踢過，但𠵱家表現不俗㗎？
筷子毅：算啦！唔發咁多夢啦！落街睇波有時都驚驚哋，好似嗰日喺商場睇澳洲對意大利，我大聲嗌：「馬特拉斯好波！拎紅牌做到嘢！」之後隔籬幾個着「東尼」衫嘅人怒睥我，心都涼一截。
招積域：捧冷門球隊嘅永遠都係少數民族，球迷又好敏感，見你咁嗌仲唔望你？你點知班友仔係咪瞓身意大利單W？你應該覺得自己好彩，意大利輸波嘅話，我驚你坐唔到喺度飲嘢。
侍仔：自己執生啦！唔好亂咁嗌，即使喺我個場，我都幫唔到幾多。
高洛文