一年到尾，周不時就有份乜乜物物排行榜出爐，噚日華華都收到份，名為「全球華人富豪和企業500強」報告，又係幫有錢佬計身家定排名，只不過今次就只受華人玩，所以頭十位都係見慣見熟嗰班人，即係賽果正常，冇乜驚喜囉！
先講富豪榜，頭十位有一半係本地薑，分別係以1504億（人民幣．下同）身家排頭位嘅超人李嘉誠，亞、季軍新地郭氏三兄弟（928億）及恒基四叔李兆基（880億），第八位新世界嘅鄭裕彤（408億），同埋第十位華懋小甜甜龔如心（336億）。
至於企業榜，以香港做總部嘅企業，而又入到十大嘅，就剩係得和黃。
中國石化集團（即係386個阿媽）就以8325.3億人仔營業收入，做企業一哥，而鴻海精密工業，就係唯一一間入到頭十位嘅台灣企業。