浸會大學慶祝五十周年，今年全年有活動，上星期五就搞咗一個校友聯歡晚會，喺大學會堂舉行。左丁山有幾位老友都係浸會校友，一人出一百蚊，買飛入場。所謂聯歡晚會，就係校友登台演唱，搞棟篤笑，區瑞強唱民歌……上台者多數係老鬼，以前到𠵱家叫做「善衡校園」上課嗰班人。
浸會校友大編輯話呢類場合，屬於校友集體回憶，自我感覺良好嘅活動，外人就難以有共鳴。好似廖秀冬局長咁，港大畢業，留學英國，因畀面鄭慕智（校董會主席）及吳清輝校長，做嘉賓坐足全場，睇見佢就辛苦，此乃做大官嘅代價之一，做民政事務局局長就參加更多不同地區聯歡活動，無論幾悶都要強顏歡笑。
大編輯話最好笑嘅節目就係司儀林旭華講到自己冇喺浸會畢業，林超榮延遲一年畢業、樓神趙國雄被勸喻退學，今日就齊齊上台為母校表演，校董會主席鄭慕智即刻發揮律師急智，話自己當年考浸會，浸會唔收佢，哦，唔怪得去咗港大啦，鄭主席嘅第一志願唔掂吖嘛。
講起嚟，以前讀書啲反叛，半反叛學生多數係叻仔、叻女，如趙國雄就因為搞學生示威，先至被勸喻退學，你睇佢今日賣樓咁多創意招數，就知道讀書時活動能力特強之人，出嚟社會辦事，有競爭優勢。但係咁喎，亦有一啲學生會活躍分子，畢業之後過份緬懷學生時代之「光榮史」，覺得打工（無論係乜嘢工）掣肘多多，社會好唔公平。於是成日走返學校，與學生「話當年」，當自己係「青年導師」。呢類人可說係心智長不大，讀完大學，對社會有乜貢獻，甚有疑問。
古語有云，小時了了，大未必佳。凡有五十年歷史嘅大專院校，可以做實證研究，將三十至五十年前畢業嘅學生，分成績（如一級榮譽至光頭畢業），追蹤番佢地喺各行各業嘅成就，從而找出學業成績與社會成就有冇必然關係，測試不同之假設（hypothesis）（例如學生會領袖多數成為商界傑出人才），呢類研究，值得支持。