今年六月，世界盃好時節，22歲的半熟男生張潤衡與友人在家中睇波，手舞足蹈、喋喋不休，企圖說服記者相信德國隊會奪魁，「德國會贏世界盃㗎！我肯定呀！」這個聲嘶力竭大喊「德國必勝」的男生，就是那位十年前幾乎被八仙嶺大火吞噬的中一學生張潤衡。
正在美國念書的他，今年回香港放暑假，除了「狂煲」世界盃外，還會與他口中的師妹兼友人「啫喱」小姐埋首寫書，新書的名稱很文藝，叫《迴旋木馬的約定》，是打正旗號的男女愛情小說。衡仔負責男主角敍述的章節，女主角部份就由啫喱處理。
美國修讀心理學
到底書中有多少是作者個人經歷？正修讀心理學的衡仔答問題學足高官，「呢兩年我睇咗好多報告，都係講感情嘅，做咗research（研究），其實呢啲嘢經常都會接觸到，好似電影、歌曲都係用呢啲做題材……我哋有時睇嚟好理所當然㗎，到冇咗先識珍惜……」
記者跟衡仔兜勻九曲十三彎，仍然未問出所以然來，惟有從故事入手。
書中男主角阿彥，是遊樂場的迴旋木馬操作員，因為某些原因，跟拍了數年拖的女友分手，就在這天，與同樣失戀的女主角阿晴遇上，二日訂立「拍拖合約」，每月15日及30日就會重新檢討雙方關係，全因大家都懷疑，對方只當自己是水泡……
那結局如何？「總之唔會係大團圓，我個人又唔鍾意悲劇收場。」「咁即係點呢？」「即係會有surprise（意料之外）囉！」
談到跟另一作者啫喱的關係，「佢係我馮堯敬嘅師妹嚟嘅，我本身同佢比較friend。」記者再追問：「聽媽打（張的契媽李麗娟）講，你拍拖喎！」「有啲咁嘅事？我唔信！點解我唔知㗎？我𠵱家嘅感情生活一片空白。」
睇緣份講feeling
「呢啲嘢好睇緣份，我個人鍾意講feeling（感覺），最緊要對方有魅力，不過我𠵱家享受自己一個多啲。」那啫喱有沒有機會？「我唔同partner（拍檔）拍拖㗎，寫書會嗌交㗎，拍咗拖就唔會嗌得贏㗎喇，不過我都唔敢講實。」不愧是新晉作家，連感情生活都懂得留下伏筆。
談世界盃、夾band、教會演講、愛情小說……曾被火傷的衡仔開展眼前滿載夢想的大道，可能康莊，可能蹣跚，但對於見證八仙嶺火劫的我們，是時候放下心頭大石了。
記者 張嘉雯