手機Send短訊普及程度，已如家常便飯，筆者更喜歡跟外地女友以短訊傾談，每筆每句都可慢慢雕，每個回覆亦可重複細味，感覺貼近小時互通情書之情懷。雖然手機在輸入方面仍受鍵盤局限，有時搵粒字搵到冇晒心情，不過NEC新出嘅N908就免除搵字之苦，手寫即認完全無痛入短訊，閒來作吓散文冧女友都唔錯。
記者：陳國輝 攝影：伍慶泉
原來，N記推出卡片手機已有好一段日子。提到鼻祖N900，當時雖則唔支援手寫輸入，冇靚相機又冇插卡，但由於外形好似卡片咁薄，極之討好，記得曾炒上$9,000依然有人吼，不知幾身嬌肉貴！近呢一兩年，水貨佬仲醒，返咗5、6款連香港N記都冇入到嘅N920、N923等國內版本，不過，始終行貨先睇到繁體中文，就算今次N908來得比較遲，總叫值得等嘅！
認中文快夾準
部機咁細，如果仲要我0至9逐粒掣慢慢㩒，甚至再塞多個5方向掣喺中間嘅話，相信「命中率」一定唔高。難得N908全程採用輕觸式操作，用Stylus代替又粗又圓嘅手指頭㩒掣，梗係方便啲啦！個觸屏原來仲有好多花臣玩，如當畫板咁填色同畫畫、另外又內置幾款TouchScreen遊戲、仲有女仔至鍾意嘅《泡泡龍》㖭。講到最大功用，中英文手寫一定走唔甩，畫面上高係手寫區，下面係揀語言以及標點符號，介面同PDA一樣好親切，而且手寫辨識率相當高。加上提供埋POP3電郵連接，Send埋Email都得。
平時見人用卡片DC嚟影Snapshot，單手拎住鬼咁型，今次自己手上嗰部雖然只係影相手機，但玩起嚟毫無輸蝕之感，有得拼喎！玩「Pro」DC最講求速度與反應，不過落到卡片機層次，就變成鬥靚芒，鬥薄身；初用上N908，就俾佢冷冰冰嘅手感吸引，梗係啦，用咗金屬外殼，唔單止實淨，重量仲Keep得住84g，唔走樣已經抵讚，何況佢厚度仲只係得12.8mm㖭！再翻轉睇吓個芒，雖唔及現時勁Hit嘅2.5"咁大，但2.2"芒已能夠顯示出26萬種色，試過啟動DC取景，就算部機搖嚟搖去，畫面仲好流暢，呢樣絕對唔係每一部影相手機都做到㗎。
行內人點睇？
Park《壹本便利》
對於呢類卡片手機，水貨佬早就係咁入，行貨雖然慢咗啲，但話晒睇到又打到繁體字，算打個和啦！
Rex《快周刊》
鋁鎂合金外殼拎上手幾舒服，不過只得130萬像素相機連插卡，市面上同款機比比皆是。
阿聲《手電&鈴聲》
以為機仔細細音質靚極有限，點知憑機背雙喇叭播歌，效果都唔錯，應付一般娛樂需要夠晒啦！
Adrian（APR公關）：
除咗NEC外，甚少廠商開發出咁薄嘅卡片DC手機，影得又聽得，兼支援手寫輸入，商務都啱用。
LearnMore
小知識
講細講薄，就唔及SAMSUNG剛剛於CommuniAsia亮相嘅「UltraEditions」X820，全機厚度只得6.9mm，算係現今全球最薄手機，而且部份機身採用玻璃纖維製成，薄得嚟亦夠硬淨。
PROFILE
制式：GSM三頻
體積：83.4×53.2×12.8mm
重量：84g
屏幕：26萬色芒
主要功能：手寫輸入、畫板、觸屏式遊戲、POP3電郵、130萬像素相機、MP3播放器、MicroSD記憶卡
＊第3季推出 售價未定
同場加映
螢光新機登陸
今日介紹嘅NECN908全無鍵盤，只靠支筆篤篤吓，的確幾有型有款，不過發布會同場仲有另一路奇兵殺出，一樣係靠搶眼賣相。呢款E1108雖非卡片式薄機設計，不過同樣引人注目，起碼機殼上包有一層搶眼嘅螢光橙及螢光綠，望落相當有陽光氣息，年輕人一機在手特別有活力！
E1108主打入門級別，雖然即場並未公布售價，不過據公關透露及行內人估計，應該係以抵玩為主，約莫賣二千蚊。睇埋機內Config；配備130萬像素相機、支援插卡聽歌等，分唇已經唔算失禮，加上咁搶眼嘅賣相，相信可吸引一班年輕人入市。
PROFILE
GSM三頻、6萬5千色芒、130萬像素相機、MicroSD卡
＊7月推出﹒售價未定
