家吓出生率咁低，學校都要改變策略，谷吓聲勢，吸引多啲學生，否則好易被李國章殺校。而保持名聲最簡單有效嘅方法，就梗係出動知名校友，叫有頭有面嘅幫吓手，一來可以Show「出品」有幾正，二來可以乘機叫佢哋捐番啲錢，啲校友回饋母校之餘又威威，直情係一舉三得。
北角名校蘇浙小學亦用咗呢條橋，噚日請到舊校友恒生大班柯清輝，做小學同幼稚園畢業禮嘉賓，真係冇請錯人。
柯大俠畢咗業44年，重遊舊地，心情不知幾興奮，頒證書畀小朋友嘅時候，仲笑到見牙唔見眼，又不斷賣花讚花香，話幾十年前，母校已經用普通話教學，佢先至有咁好嘅中文水準。
入蘇浙係阿爸柯打
柯清輝話，細個由福建嚟到香港之時，爸爸雖則喺菲律賓咁遠打工，都知道蘇浙係名校，所以一早落咗「柯打」，要佢無論點辛苦，都要入到呢間學校。咁佢都冇丟架，先考入夜間小學，讀五年班上學期，喺老師鼓勵同幫忙之下，好快就適應新環境，到下學期，已經可以轉番去日校讀書，62年畢業之後，跟手仲入埋英皇書院，由北角去咗西環，條青雲路係點大家都知！
李華華
讀者如有任何意見或報料，歡迎發送電郵至[email protected]。