息口加幾多好快有結果，至於對樓市有咩影響，可能仲要睇多一兩個禮拜，家陣有咩好做得過搞吓民意調查吖？
香港置業呢鋪率先跑出，用兩日時間，訪問276位準買家，結果47巴仙話加息唔會影響入市意欲，話有影響嘅佔42巴仙。港置話，佢哋喺5月份美國加息前夕做嘅相同訪問，225位準買家中，話冇影響嘅佔53%，有嘅佔39%。睇嚟今次市場一直吹風加息嘅心理影響真係大咗喎。
今次訪問，有85%人認為香港會跟隨美國加息，28%估計香港會加足半厘，而加0.25厘嘅佔72%。港置胡日發估計，香港加息幅度，最多都係0.25厘，而且已經連續加息十幾次，點計都應該就快停一停、唞一唞。