男人之苦真係鑊鑊甘，除咗要日捱夜捱為頭家，返工又要受氣，連返到屋企都要受老婆仔女氣，真係有怨無路訴。但煮嘢食同人生經驗都咁豐富嘅超哥，就從苦瓜中悟出做男人嘅道理，5味苦瓜菜、代表5種人生哲理，想做個頂天立地「好男人」，先學食苦瓜先啦！
記者：曾靜茵
攝影：何家亮
示範：鑽石山超哥
小魚乾苦瓜片冬菇先隔水蒸
價錢：$15/２人
需時：10分鐘
苦瓜又叫君子菜，因為瓜味雖苦，但從不會將苦味傳給其他食物！就如用苦瓜炒魚乾、蝦乾及冬菇，都絕不會沾上苦味，正如人生一樣，有苦自己知就夠，唔應該將不快帶返屋企，影響家人心情。
材料
苦瓜半條（切絲）、鱈魚乾２湯匙、蝦乾２湯匙、冬菇３隻（切絲）、蒜頭３粒、辣椒適量、葱適量、糖１茶匙、鹽１茶匙、麻油少許
冬菇$64/斤（a）
魚乾$60/斤（a）
辣椒$4/包（a）
簡易法
1.冬菇、鱈魚乾、蝦乾先浸水，苦瓜、冬菇走油；
2.爆香小魚乾、蒜片、葱、辣椒；
3.再放入苦瓜、冬菇炒香，調味後燜煮即成。
貼士：
冬菇可先隔水蒸，入口會更軟腍。
紫蘇葉釀苦瓜切忌太厚
價錢：$12/4人
需時：15分鐘
釀苦瓜加紫蘇葉，就正如男人出來做事一樣，就算俾人砌生豬肉，加鹽加醋之後都仍然要好硬淨，即使受盡煎熬，外面仍然香脆，再配以金黃色的豬肉，香中帶甘，令人回味。
材料
苦瓜１條、豬肉６両（絞碎）、新鮮紫蘇葉1/2塊（切碎）
芡汁：糖1/2茶匙、鹽1茶匙、生抽1湯匙、水２湯匙、粟粉少許
豬肉$18/磅（b）
紫蘇葉$4/両（a）
麻油$13.9/207毫升（c）
簡易法
1.苦瓜切段，去瓤；
2.豬肉調味後，加入紫鮮葉攪勻，釀入苦瓜中；
3.放入鑊中煎至兩面金黃色，淋上芡汁即可。
貼士：
苦瓜要揀長形，切段不可太厚，以免釀入豬肉太深難以熟透。
話梅涼拌苦瓜要浸過面
價錢：$15/4人
需時：20分鐘（未計浸時）
阿仔成日都口痕痕鍾意食「口立濕」，搞到身形暴脹，想佢將蔬菜當零食？NoWay！所以超哥將苦瓜片浸於話梅水中，將苦澀味去除；酸酸味味嘅話梅味，配上性寒的苦瓜，正好提醒阿仔出嚟社會做事，切忌有寒寒酸酸呢種壞習慣！
材料
苦瓜1條（切片）、話梅４両、梅酒少許、鹽1/2茶匙、糖1茶匙
苦瓜$6/512克（c）
話梅$11.4/115克（b）
梅酒$129/750毫升（b）
簡易法
１.話梅以滾水浸約15分鐘，加入梅酒、鹽、糖調味；
２.加入切片苦瓜，放入雪櫃浸泡半天即成。
貼士：
浸泡時，話梅水要蓋過苦瓜。
豆豉排骨燜苦瓜要快炒
價錢：$20/4人
需時：15分鐘
豆豉味道雖然夠濃，不過當中亦帶少少的苦澀味，再配以苦瓜、酸菜及排骨來炒，都可算係「甘苦與共」，食落好惹味；其實做人又何嘗不是呢？做得幾辛苦都好，望住身邊人同你「甘苦與共」，甚麼不快都馬上拋諸腦後啦！
材料
苦瓜1條、排骨８両、酸菜1條（切條）、豆豉1茶匙、葱1/2條、薑3片、生抽1湯匙、糖1/2茶匙、鹽１茶匙、粟粉1茶匙、水1/2杯
豆豉$2/100克（c）
排骨$26/斤（a）
酸菜$8/斤（a）
簡易法
1.排骨先以薑葱爆香，撈起備用；
2.爆香豆豉，放入苦瓜略炒；
3.再放入排骨及酸菜炒勻後，加入適量水及調味燜煮6分鐘即成。
貼士：
排骨先走油會更爽口，爆香豆豉時要快炒。
苦瓜菠蘿魚湯千祈咪攪
價錢：$22/4人
需時：15分鐘
近排天氣熱，超哥就試吓用魚湯再加入菠蘿來滾苦瓜，發覺菠蘿同苦瓜的味道出奇地夾，未入口先聞到陣菠蘿嘅清香，而飲落又先有苦瓜的甘，再有魚湯的甜，仲醒多句畀個仔：「出嚟做嘢同飲湯一樣，苦盡就甘來嘞！」
材料
紅衫魚１條、苦瓜1條、菠蘿1/4個、薑4片、鹽1茶匙
紅衫魚$1.8/両（a）
菠蘿$6/個（a）
薑$4/斤（a）
簡易法
1.苦瓜、菠蘿切片備用，魚以鑊爆香；
2.爆香薑片，放入苦瓜略炒，再加入水、魚及菠蘿滾約10分鐘，調味後即成。
貼士：
苦瓜以油鑊先爆味道會更香；入魚後不要攪拌，以免魚骨散開。
煮苦瓜小貼士：
想去除苦瓜的苦澀味，可以落少許鹽令苦瓜變得軟身，然後再以水沖洗，這樣就可減低苦澀味。
（a）觀塘瑞和街街市
（b）觀塘輔仁街百佳超級市場
（c）觀塘宜安街惠康超級市場
以上價錢以6月28日為準
