美股急挫，日股散散哋，港股則硬嘢。結算前夕，期指一度掟低226點，埋單只係唔見32點，見淡追淡者又一鋪。恒指收市跌32點，滙控（005）與中移動（941）兩隻大藍籌總共拖低27點，幾乎包晒跌幅，即係話其他成份股合計，差不多冇跌到，當美日股市下挫冇到。
市場氣氛好，多得國企股掂檔。H指有接近1%進賬。
短期策略，仍係喺低位撈C輪。美國開始議息，一旦加息塵埃落定，個市上升多過下跌，因為唔明朗因素消失。
中移動C輪3631：吼中移動再軟少少之時，買熱門C輪3631。隻輪10月初夠鐘，輪價38仙，溢價5%，槓桿率11.1倍（有效6.9倍），引伸波幅33.7%。
4545亦係熱門貨，溢價2.2%，槓桿率18.4倍（有效12.3倍），引伸波幅32.4%。爆炸力與殺傷力大好多，時日有限，下月19日最後買賣（剩番15個交易日），萬一正股唔升唔跌，隻輪到尾只值13.5仙，即係會跌超過4成。
網通C輪3627：網通（906）繼續有勢，收13.20元，升0.20元。博隻股票做櫥窗粉飾好多些少，揀C輪短炒，對象仍然係先兩日推介嘅3627。隻輪12月初到期，輪價18仙，溢價10.6%，槓桿率7.3倍（有效4.5倍），引伸波幅44.57%。睇溢價，隻輪唔算平，但其他同類C輪更貴。
章盛