辣得有人情味
我辣椒仔推介位於街市熟食中心嘅「泰興」，環境簡陋但勝在人情味厚。老闆娘招呼周到，叫少少嘢都有甜品送。講番食物，呢個香辣紅咖喱（可配豬、牛、雞，$26）雖然無我辣椒仔咁啃，不過超香濃，又用口感似翠玉瓜嘅泰國矮瓜，跟飯食飽到上頸。
a.泰興泰國小食（23895043）
地址：觀塘瑞和街市政大廈四樓17號C
辣得夠香口
我黃椒撐開業32年嘅「榮華川菜館」，至正呢味回鍋肉（$40）。店方選用肥瘦適中嘅嫩滑豬大髀肉，先炸一炸逼出豬肉多餘脂肪，浸水煮熟後配辣油，辣得嚟又唔會蓋過肉質鮮味，我畀100分。
b.榮華川菜館（23410583）
地址：觀塘崇仁街15號地下
辣得夠皮為止
我綠椒鍾意呷醋，辣方面尤其喜歡酸辣，好似呢個酸辣米線咁（跟餐送豆漿$23），用料全都從雲南入貨，包保食到正宗雲南風味。嫌唔夠辣？出聲啦，店方會無限量幫你加辣，想挑戰味蕾極限？幫襯呢間無衰，我話嘅！
c.雲南風味餐廳（21747338）
地址：觀塘崇仁街17號地下
