上周講到利信達（738）可能趁業績好配股抽水，當真昨日就停牌。據講隻股以先舊後新方式，每股定價1.10元，配售1億股多些少，集資額1億餘元，而集資所得用嚟返大陸搞零售。
利信達配售價較停牌前收市價1.20元折讓8.33％，雖然市況麻麻哋，但經紀黃話啲貨都去得晒，至於今日復牌股價表現如何，佢就估唔到。經紀黃又話，利信達嘅賣點，就係發展模式與永恩（210）相若，主力發展大陸鞋業嘅零售市場。
講開永恩，股價由4月高位5.90元回落，最低見過4元邊，近日好番啲，昨日微跌唔夠0.6％，收4.375元。
雖然永恩近期股價表現低迷，但就有證券行出嚟唱好，話可以趁低吸納，例如摩根大通最近就出咗份報告，話永恩今年喺大陸開舖速度雖然慢咗，但全年估計可以達標。另外，有分析員問過公司會唔會批股，公司話夠錢使，唔需要批股，如果要錢使，舉債成本會平啲。
慕容小初