前日孫柏文建議各位靠投機買賣過活嘅fan屎，喺花旗國聯儲局主席伯南克「發功」之前，放幾日假「叉」吓電。等到大家都可以摸索到伯南克叔叔究竟想做啲乜之後，先至繼續投機買賣。仲有，作為一個負責任嘅財經口水佬，我當然以身作則咁去放假。
原本想去布吉行吓，不過得一日假，所以去唔到泰國布吉，就連深圳嗰個都因為有禽流感H5N1，所以都冇得去。仲有，我有一個來自花旗國，同我一樣支持自由市場嘅朋友要接待，所以就留番喺我哋特區裏面，接待完朋友之後，我就乖乖地返屋企睇電視。
睇睇吓，就睇到新聞節目，見到我哋嘅全國政協主席賈慶林同志，由曾特首做佢導遊嘅自由行訪問之旅啲活動。
數碼港好鬼旺
報道話賈同志親身視察我哋特區好多人都認為係有國防戰略價值，今日好多外國人垂涎欲滴嘅電訊資產，該資產亦都係我哋特區人民視為前任特首董建華其中一個最成功的德政。呢個電訊資產就係車水馬龍、客似雲來、人山人海嘅數碼港。我一睇到呢段新聞報道，第一個反應就係驚賈同志誤會，點解平時好旺嘅數碼港，忽然唔見晒啲人。因為以賈同志嘅智慧，一定知道我哋特區政府冇理由會帶佢去啲「拍烏蠅」嘅地方，所以我第一時間腦海中就出現以下可能會令到曾特首尷尬嘅對白。
賈同志︰小曾啊，你們清場的力度不用這麼強吧？看！一個人都沒有。
曾特首（無奈地）︰賈主席，這裏平常也是沒人的。
賈同志︰你不要再狡辯，這樣太難看啦！你用這麼強的力度清場，煩擾了香港老百姓的每天生活，人家還以為我不夠親民呢。
作為一個自由行旅客來到香港，我都希望賈同志可以同其他自由行旅客一樣，可以去金碧輝煌、擺滿黃金飾物嘅「金至尊」展覽廳。去完之後，可以受到自古至今，黃金對人類五官刺激嘅感染。返到京城，可以落壓力畀我哋中央人民銀行，要佢哋買多啲黃金、白銀，去分散外滙儲備嘅資產分布。我咁諗都係因為聽講最新一期嘅非正式報告，中央人民銀行淨係5月，外滙儲備增加咗300億美元，令到外滙儲備總共達到9000幾億美元。
大惡霸欠你錢
我仲記得早排我哋中央人民銀行嘅外滙儲備超越日本嘅時候，好多冇我哋《蘋果日報》咁「唔識趣」嘅內地傳媒財經版行家，都以普天同慶嘅心情，同埋「成功追英趕日、榮登強國行列」嘅角度去報道呢段新聞。講真，祖國人民有9000幾億美元嘅外滙儲備，就有如一班學生，班中嘅惡霸問你借錢，你愈借愈多畀佢，最後個惡霸欠你9000幾億，佢最後還唔還錢畀你都成問題。你個妹妹仲要同你講：「啊哥你好勁！個惡霸欠你咁多錢，仲要係全班學生裏面欠你最多！」咁嘅妹妹係唔係需要再教育，需要用隻金手指去篤醒呢？
最後，人民銀行畀大家知外滙儲備增加咗咁多嘅原因，可能因為𠵱家中央正在開緊閉門會議，商討大陸銀行改革政策，亦即係要傾關於大陸銀行呆壞賬嘅問題。可能佢哋會宣布，再一次用外滙儲備注資畀啲銀行，不過唔希望大家對人民幣冇信心，所以預先宣布外滙儲備瘋狂增加，以達致穩定軍心嘅作用。
孫柏文