屆屆世界盃都有啲爆冷賽果，好似上屆嘅南韓、日本同塞內加爾咁，令到班講波佬同埋一大堆球迷跌晒眼鏡。今年就一反常態喎，賽果非常正路，八強階段淨係有隊新丁烏克蘭較冷門外，全部都係啲實力分子。戲碼唔單止有睇頭，仲俾班講波佬貼中晒啲貼士，個個爭住喺專欄度晒威水認叻，個個都變晒足球專家咁。
不過咁樣都好嘅，8強隊隊都有靚仔球星，巴西有卡卡，英格蘭就有碧咸，至於意大利就有托迪、基拿甸奴呢啲型男，任君選擇，包保班女fans為之尖叫，唔會喺老公男友面前嘈喧巴閉。如果咁唔好彩，俾加納、厄瓜多爾同墨西哥入咗8強，班女fans肯定會將不快情緒發洩喺老公男友身上，唔單止搞到冇得睇波，分分鐘仲嗌大交離婚收場。所以今屆熱門跑出，對全城嚟講，都係皆大歡喜。
彭浩翔
電影導演