上星期去咗北京，不如就講吓當地搞奧運嘅進展。
人生路不熟，當然要搵個人帶路。我有個朋友係做官嘅，咁梗係搵佢。佢同我講話可以帶我周圍睇吓，不過咪影相。我問點解咁機密，佢話副市長俾人周咗要「雙規」，𠵱家好敏感，衙門講咗唔准亂影相、攝影。
佢車我周圍去，點知塞車塞到有時可以幾個鐘都喺架車度。佢話冇計，因為度度都起緊嘢同埋種緊樹。中國講咗，奧運三大要點：運動、環保、文化，所以要綠化。
奧運村就喺北京市北面，足足有二十個維園咁大，可能唔止，總之就好大面積。我朋友講奧運村同故宮係喺同一條直線上，因為要起村，所以要拆好多屋，點知有次拆到一座廟，一鏟個地下，原來有好多蛇，跟住雷電交加，啲工人唔敢鏟。朋友話呢座廟𠵱家會保留，而呢座廟正正同故宮坐落喺同一軸線上。我問啲蛇呢？佢話送咗去動物園。
好多地方都仲係工地，不過有幾座體育館都差唔多成形。其中有座好大嘅，佢話係雀巢，睇落又真係幾似。
佢講中國人有三個夢：參加奧運夢、奧運攞獎夢同埋主辦奧運夢，所以老江話「中華圓夢」就係咁意思。
中國要圓嘅呢個夢講真真係一殼眼淚。甲午戰爭要打仗，冇參加，跟住八國聯軍，之後直頭連清朝都冇埋，仲點參加？中國第一次有雜誌講奧運嘅係喺1908年，到2008年，啱啱一百年。知道有奧運又點？大家知發生乜事。喺1932年有人話日本仔想用偽滿洲國嘅名義去參加奧運，當時政府急急腳報名，點知唔知點搵人，最後有三個人進場，擔旗嘅係中國人，跟住係一個韓國人一個係美國人，所以全中國只有一個代表！
國運唔好，人民嘅命運亦會跟住唔好，仲講乜嘢運動？
中國可以主辦奧運真係值得大家高興，但高興之餘一定要向年輕人講吓呢段歷史。
今次中國進場唔會得一個人，而係浩浩蕩蕩嘅中華兒女。
觀火