銀行出手愈嚟愈豪，睇吓信用卡迎新禮品就知，一百幾十嘅小型電器已經Out晒，想搵人落叠，冇一千幾百甚至過萬蚊嘅禮品，都好難吸引到人客開新卡。
近期最出位嘅例子，一定係滙豐嘅信用卡迎新優惠，送PSP、iPodnano不特止，最激係萬八蚊嘅32吋LCD電視，仲特意將中環滙豐總行粉飾吓，等啲客走到總行3樓大堂時，就會發現啲「模特兒」喺玻璃天花上「行天穚」，展示啲迎新禮品。
雖則部LCD電視要幾個人一齊申請，仲要簽夠數先攞到，但華華問過滙豐，佢哋話反應非常好，仲話30號前遞表，成功申請就有呢個優惠！
啲迎新禮品咁重手，會唔會蝕錢搶客呢又？有賓架同華華講，銀行打開門做生意，梗會計過度過。
佢哋計過數，話成功吸納一個新客嘅宣傳成本，大約係千幾蚊（呢個已經係兩三年前嘅數據，家吓應該有增冇減），佢哋只係重整資源，投放多啲喺禮品上，直接令個客受惠，同時減少啲廣告費用，拉上補下，整體Budget相差唔大，但出嚟嘅效果就好好多。