地產代理每年都吸納唔少剛畢業嘅年輕人入行，做得長唔長就冇咩統計資料可參考，始終唔少人都認為，入代理呢行係以搵快錢為目標，如果運氣好，隨時一年就搵夠人哋幾年人工，即使唔啱做或者冇運行，最多咪轉行囉。
而喺代理行嘅角度睇，吸納大班精壯小子做生力軍，遇上新盤大賣時機或者二手突然旺場，調兵都有彈性得多，加埋重點培訓，隨時培養出新一代跑數新星都未定，始終大志搵錢嘅年輕人，係有無限可能嘅。
香港置業早兩日參加由職業訓練局舉辦嘅「學生就業資訊展2006」，向一班即將畢業嘅年輕人招手，同時提供免費職前課程，一共5堂，正常係要畀千二蚊先有得讀㗎。
講開代理培訓課程，世紀21早排亦搞咗個「樓花轉讓的法律入門知識」課程，係同港大持續進修學院合辦嘅，仲請嚟資深律師授課，參與課程嘅人超過50位，過半數係獨立地產代理。