從來試菜，只會從味道入手，好鹹、好甜、好酸……不過今次試過主打法式越菜的新店「BAAN」後，我想講句︰「好Relax。」何解？看似平平無奇的食物加入香料烹煮後，不僅帶來味蕾上的刺激，亦為我帶來另一種身心放鬆的享受。
記者︰方綺君
攝影︰伍慶泉
模特兒︰Ellen
1.炸軟殼蟹牛油果米紙卷$62
做法簡單，用越南米紙包金不換、牛油果和軟殼蟹。剛炸好嘅軟殼蟹由越南新鮮運到，配自製香茅香橙汁，灑海鹽、乾辣椒和乾橙皮碎，口感豐富，果香令蟹味更突出。
2.下龍灣鮮蟹肉番茄湯檬粉$58
「下龍」，字面解巨龍入海嘅地方，傳說越南呢個海灣上嘅島嶼，係一條龍尾嘅化身。檬粉未入口已經有勁香香料味，索一索甚醒神，鮮紅色番茄湯底一喝上癮，啖啖肉蟹鉗辣中帶甜，我好Buy。
3.越式火車頭鮮牛肉湯檬粉$62
選牛小腿肉，慢火煮腍鮮肉切成薄片，加大量金不換和香茅，係越南最地道食法。湯底精心調製，Doublecooking煲兩次，經第一次隔渣後湯底變得更清澈味濃。
4.荷葉包黃薑蟹龍蝦飯$58
越式糯米雞？材料有蟹肉、龍蝦肉和竹笋，加入大量香草，先炒香再包入荷葉內蒸，製成後首先是一陣濃烈薑香，再來是蟹肉同龍蝦肉嘅味道，味道清新。
5.蕉葉烤銀鰽魚釀大蝦慕絲$98
法式越菜代表，用法式做法將大蝦慕絲釀入銀鰽魚內，再加各式香料和蕉葉烤烘，魚皮燒得非常惹味，內層的魚肉則香滑鮮甜，淡淡黃薑粉和蝦膏香，唔會搶走銀鰽魚本身嘅鮮甜。
6.蜜餞豚腩配蘋果汁$55
豚肉以秘製蜜餞和香料醃製3小時，由於肉質較肥膩，最好食法係用蔬菜包好再點自製蘋果醬，要令口感更上一層樓，最好灑少許橙味海鹽。
7.熱香蕉焦糖布甸配鮮蜂蜜雪糕$50
口感軟滑，極濃香蕉味與焦糖及雪糕嘅蜂蜜味，配合得天衣無縫，食完好滿足。
新菜式加不同香料
公器私用都係咁話，呢排好多稿交，又要睇世界盃瞓得唔好，搞到個人殘晒，見到模特兒Ellen容光煥發，問點解？佢一句講晒︰「瞓得好，精神夠，人都靚啲。我返屋企會點香薰，放香油入熱水浸浴，聞得多香料味道，人都Relax啲。」講得啱，好多護膚品同沐浴露都有香料成份，標榜香料可以舒緩緊張放鬆心情，何況係食物？我係食版記者，我相信佢講嘅嘢，聞完餸香，再食落肚，人一定會Relax啲。一收到消息知道apm開咗間新餐廳「BAAN」，我即刻仆到去試菜，因為餐廳主打呢排好流行嘅法式越菜，大廚特地從越南、泰國、馬來西亞等東南亞地區搜羅香料同食材入饌，我希望試食到餐好兼──「索」到餐好嘅。
睇埋裝修
裝潢有殖民地色彩
一入「BAAN」大門口，餐廳負責人就話：「我哋專登布置到好似殖民地時期嘅越南咁，等食客可以有味覺同視覺雙重享受。」齋講無用，望吓裝修先，巨型藤製吊燈、懷舊梳化、吊扇，加上一室柔和燈光，樓底高感覺開揚，未真正飽口福身心已經放鬆一大半；埋枱，坐定定，試食下龍灣鮮蟹肉番茄湯檬粉，一「索」攻鼻香葉味成個人醒晒，Ellen話︰「嗒真啲，香料味落喉嚨後會滲出淡淡幽香，合埋雙眼就好似有人按摩緊個頭咁。」嘩，Ellen你收咗人錢呀，咁落力賣廣告？無錯誇張就係誇張咗，不過的確係香料施魔法，試食完畢，「索」夠餸香，我已經勁有搵周公嘅衝動，Relax，咪就係咁囉。
香料有幾堅？
搵食攻略
BAAN（31481181）
地址︰觀塘道418號apm商場C-16號舖
營業時間︰12:00nn-11:00pm
交通︰觀塘地鐵站A出口
座位︰約100個，晚市墟冚，宜先訂位
最好賣︰蕉葉烤銀鰽魚釀大蝦慕絲、炸軟殼蟹牛油果米紙卷
有着數︰即日起消費滿$200或以上，可參加每周抽獎，有機會贏取$500晚膳餐券一張。