側田第二次拍戲便與吳雨霏（Kary）一同孭飛做男女主角，他卻狂踩自己做戲沒有天份，拍大頭很肥，又謂拍戲比做音樂辛苦很多，原來拍戲、拍廣告及吊威吔均是他最不想做的工作，稍後他要與Kary拍一場親吻戲，要清場及喝酒壯膽，側田更笑言似亂倫。
側田與吳雨霏首次擔正任男女主角的新戲《戀愛初歌》，前晚在中環取景，二人首先與方力申拍攝一場在中環相約飲酒的戲份，飾有錢仔的方力申駕駛保時捷到達，之後三人移師到藝穗會室內拍攝，Kary一見鼓就馬上試打，看得側田大讚：「你真係勁喎。」
首次任男主角的側田自言沒有壓力，但他竟狂踩自己道：「我自己知自己唔係個勁演員，唔覺自己很有天份，套戲都係叫我做番自己，唔係我都唔識做㗎，我又唔係TomHanks（湯漢斯）嗰類可以好快入戲。」
根本唔想拍戲
側田更揚言從未想過自己孭飛做男主角，他說：「我都唔覺得自己做戲好睇，大頭又肥，拍戲好辛苦，唔同作歌，寫歌寫到攰都可以唞吓打吓機，拍戲咁趕，我係導演都唔會畀break，一日拍十幾個鐘。」滔滔不絕一輪後，側田突然醒覺道：「我係咪唔應該咁講？好似潑部戲冷水咁。」
側田謂戲中他要與Kary拍親吻戲，感覺有如亂倫，他說：「我當佢妹，到時要清場先拍，好尷尬，我諗要飲酒壯膽。」問側田拍戲及唱歌都做了，有甚麼想做未做？他說：「冇啦，今年做晒全部唔想做嘅嘢，拍廣告、拍戲同吊威吔。」會否做舞台劇？側田說：「唔好喇啩。」
Kary遭淋屎
Kary則謂她與側田都是螢幕初吻，她說：「我都當側田係大佬，不過我情願錫個好熟嘅，都好過三唔識七。」Kary謂她最深刻一場戲是拒絕一位男仔追求，竟被對方淋屎，Kary說：「雖然唔係真，但都好難受，之後我咪攞側田出氣囉，鬧人鬧得勁返到屋企都勁肚痛。」
此外，側田昨日以代言人身份出席手機活動，他透露除獲不俗的酬勞外，更獲贊助全年新手機任用。被問到未來最想接那一種產品廣告？側田表示最想接拍有關音樂器材、電腦產品等廣告，他說：「內衣褲廣告就冇本事接，我都冇身材，我平時連底褲都唔會自己買，咁耐以嚟都係媽咪由美國寄嚟畀我。」
採訪：楊潔雯、卓美娟 攝影：陳偉權
