港股高開低收，恒指一度升近90點，但午後走軟，以近全日低位的15774收市，跌30點。
臨近期指結算，大戶繼續做工夫，滙控（005）同中移動（941）遭力壓，滙控由於有多隻窩輪要計價，大戶推低佢，自然加多兩錢肉緊，以133.50元收，跌0.60元；中移動原本收市前仲成緊42.90元，但就連插8個位，卒之低收42.50元。至於噚日提過的中石化（386），大戶亦係為咗窩輪計價，由4.30元㩒到落4.175元收。
大市升到上15800水平，反覆兩三日，再上衝高位的機會甚大，短期目標係16200至16300。今次反彈市（暫未確定中期已見底，但可能性愈來愈大），中資股已行先，H指連升5日，市場焦點在石油股、資源股同金融保險股，在強勢股累積一段升幅後，落後股會發力追上。
3隻中資保險股，以中國財險（2328）最落後，以PE計亦係最抵買。
初步目標3.15元
先睇中財險嘅走勢，高位係3.525元，噚日收2.60元，跌幅26.2%。中國人壽（2628）由13元到噚日嘅11.45元，跌11.9%；而平安保險（2318）由24.20元到21.80元，跌9.9%。中財險只要將跌幅收窄到15%，股價已可重上3元水平。
過埋今個禮拜，中財險生意就會突然大增。汽車保險係中財險嘅核心業務，由7月1日開始，中央將實施機動車第3者責任強制保險，而擁有近50%市場份額的中財險，肯定係最大受惠者。內地現時有1.3億輛汽車，只有4600萬輛有投第3保，佔總數不過35%，強制執行後，中財險會做多幾千萬輛車嘅生意。
迎接「7.1」家吓可買定中財險。05年（12月年結），中財險賺11.13億元（人民幣．下同），比市場預計為差（這亦是股價表現較弱的理由），但06年經營情況大有改善，高盛就估計盈利可達17.8億元，而07年更可上升到25.92億元，每股盈利分別為0.19元和0.24元，預測PE分別為13.6倍及10.8倍。國壽同平保06年預測PE約26倍及25倍，中財險PE低成一半，好吸引。
中財險股價已重上10日線和20日線，2.70元係近月高位阻力，衝破後升勢可確認，初步上升目標係3.15元。
郭兆誠