香港近排熱到死，連天文台都話呢個禮拜係酷熱天氣，夜晚黑唔開冷氣都幾難瞓得着！不過好多人習慣一瞓醒，就熄晒冷氣跟手開埋窗，諗住慳電啲又通風啲，咁就出事喇。由於太大溫差緣故，若瞬間將家中溫度跟室外同步，空氣中水份就會急速凝固成液體，依附喺電器上，最佳例子係你會發覺電視、屏幕一類嘅玻璃面上，會有一層薄薄嘅水點喺度！雖然呢點常識連小學生都知，問題就係呢啲小水點對電器一類產品係極大殺傷力，尤其Notebook呢類空間狹小嘅精密電器，真係好易出事！電腦男老闆部大電視就出現「開關不良」病徵，為睇世盃仲要第2晚買過部新電視㖭！
預防方法其實好簡單，好似電腦男咁，習慣每朝起身第1件事就係熄冷氣、開風扇，跟手刷牙洗臉換衫，搞完一大輪，起碼半個鐘後臨出門，先至打開家中窗戶，盡量減慢室內溫差嘅變化，咁樣「水氣」就唔會凝聚得咁厲害，大家嘅愛機可以襟玩啲。