今年真係格鬥界懷舊年，繼《街霸》、《龍虎之拳》同《拳皇》系列後，卒之輪到另一經典《餓狼傳說》系列合輯再翻出。整個合輯有齊1至3集《餓狼》，再加埋筆者認為至今最好玩嘅Special版，合共4隻Game集於1碟，預計售價3百零蚊港紙，真係相當之抵玩！
今次算係該系列首次移植至PS2上，對機迷嚟講比上述幾個系列更有珍藏價值（除非你已玩厭MAME），玩遍4集，相信大家可從中再一次感受吓SNK當年點樣扭盡六壬去火併《街霸》；由平面格鬥演變至3條戰線嘅「仿立體」舞台、誇張華麗嘅超必殺技、騎呢古怪嘅對手等，令《餓狼》系列在《拳皇》出世前，擔當抗衡宿敵CAPCOM重要嘅一環！
呢個PS2版合輯懷舊價值大於一切，4隻Game都可算忠於原作，只係好多隱藏角色一開始已經用到，如《龍虎之拳》Crossover過嚟嘅坂崎獠，另外支援BB上網對戰、自定服裝顏色配搭、新舊BGM選擇等。
記者：徐影龍
官方網址：game.snkplaymore.co.jp/
