政府部門及公營機構，紛紛投入5天工作周嘅大潮流，金管局雖然已經脫離公務員架構，但喺5天工作周安排上，亦緊跟「阿公」行事，員工約600人嘅金管局，噚日宣布，鐵定9月4日推行5天工作周，與銀行5天結算，及獅子行5天工作周，同日開始。
不過，坐落喺該局總部55樓、甚受市民及遊客歡迎嘅資訊中心，就維持周六早上開門，連帶接待處亦要繼續五日半運作。
55樓維持5日半
咁又啱嘅，自從遷入國金中心後，憑住地理優勢，可一覽維港景色，金管局已成為國家領導人訪港必到景點之一，好似噚日抵港嘅政協主席賈慶林，同埋舊年主持廸士尼開幕嘅國家主席曾慶紅，都親臨國金二期，聽取任總滙報本港金融市場發展之餘，倚窗眺望廬峰美景。具有咁重要嘅戰略價值，周末又點可以唔開呢。