用咗幾年DC，睇住CCD像素不斷提高，冇錯係相片愈嚟愈細緻，不過對我嚟講，始終認為鏡頭最緊要。初試柯達呢部新DC時，發覺鏡頭做得幾靚，高倍數變焦Zoom得勁外，最鍾情佢偏向豐富兼重色，影出嚟嘅相頗有歐洲機風範；以跑馬地試機相為例，的確影到另一番風味，唔講仲以為喺歐洲取景㖭。
記者：許福合
攝影：陳盛臣
睇Z612外形，其實算係一部中型DC，唔算大部，當然與卡片DC輕巧自然無得比，不過配合白銀色機身，整體觀感都算不俗，而600萬像素CCD，雖然已經算係中檔級別，但自問已經好夠用，尤其差唔多人人都有電腦嘅今日，相信大多數人影完相嘅都只係會放喺電腦儲存，即使要曬出嚟，4R足夠有餘。當第一次拎Z612上手預備拍攝，感覺有啲奇怪，事關摸唔到快門掣喺邊，原來快門掣設計得非常「貼身」，用慣就無所謂，第一次用真係可能搵唔到。實際拍攝速度就有讚有彈，讚嘅係對焦速度非常快，加上設有防手震同多點對焦功能，即使畫面顏色相近，都無影響對焦，可惜係當按下快門，就會發現用上600萬像素拍攝，存相速度起碼要3秒，雖然唔會影響拍攝下一張相片，不過若要連續快拍，就比較難做到。
高變焦配EVF
Z612嘅精髓，仲係佢用上12倍光學變焦SCHNEIDER-KREUZNACHVARIOGON鏡頭，相當於一般相機35-420mm，由於高倍數關係，鏡頭會隨變焦伸出伸入，最長要伸到成隻手指咁長，變焦速度就覺得只係一般，可能同長鏡有關。同好多高倍數DC一樣，Z612亦用上EVF電子觀景器，機背左邊就設有LCD/EVF掣，按下就可切換。雖然機背有成2.5吋咁大，加埋又係靚芒，戶外睇其實都可以好清楚，不過當用上12倍變焦時，睇LCD手震機會好大，若再開埋數碼變焦，更係震到影唔到，所以轉用EVF，可以用塊面去幫手穩定機身，要影遠景就比較易。試過Z612後，發現機身手柄同LCD位置，經過一段時間操作都有發熱情況，唔通因為最近天氣熱，連DC都心火盛？
鏡頭實試
有感而發：星臣（副刊攝影師）
用慣大機，覺得Z612好輕，手柄位設計唔錯，手感不俗，尤其係重量分布得宜，當需要單手拍攝時，就可以更為穩定。機背按掣設計得唔好，十字掣放得太低，單手操作時，要縮手指才可按到。其實將Review同十字掣互轉就最好，Review影完才會用，放喺邊其實不太重要。
PROFILE
感光元件：600萬像素CCD
變焦：12倍光學、4.2倍數碼
屏幕：2.5吋
儲存：SD/MMC卡
體積：104×74×69mm
重量：300g
查詢電話：Kodak（800901514）
