侍仔：今晚冇波打，去到星期五先有德國對阿根廷嘅8強賽，呢兩日一定少咗好多客，我又唔使做到冇停手。
菠蘿文：我呢啲賭徒又可以唞番兩日，做吓功課之後又再出擊。
招積域：侍仔都可以陪吓你個韓國女朋友啦，如果唔係佢發你脾氣時都好難頂，食多多人參都唔夠你補。
捱夜睇波湯水潤一潤
侍仔：你食咗咩野？把口咁臭嘅？我私人醒碗赤小豆鯪魚湯你下一下火先啦，費事你臭走我啲客。
菠蘿文：係喎，又真係好臭喎，你晚晚睇波就唔該顧吓自己健康啦！明知捱夜熱氣又影響消化，就飲一啲下火湯水潤一潤，唔好搞到自己個口食咗屎咁臭！
招積域：我呢類單身人士都冇時間煲湯飲，侍仔你幫我煲吓啦！
侍仔：輸錢輸懵咗你吖？冇時間煲湯咪食吓水果囉，功能一樣嘅啫，乜生到你咁蠢，唔怪得成日輸錢。
熱門抬頭人財兩空
招積域：唔好提啦！我成個賽事冇贏過錢，兼一場都無中過，成日開熱門，買大開細，搞到我呢類捉冷門嘅損手爛腳！又黑仔又口臭又識唔到女朋友，真係既灰又可憐！
菠蘿文：識女仔呢樣就唔使驚嘅，學吓侍仔去人群中睇波咪可以識囉。
侍仔：都可以嘅，但唔好攬錯女呀，如果唔係會好似新聞嗰個人咁俾人斬6刀！
菠蘿文：我估計8強賽事都係正路波多啦！英格蘭嗰場可以敲吓葡萄牙贏嘅。雖然葡萄牙話少咗迪高同哥斯天拿，但英格蘭根本唔識進攻，葡萄牙讓車馬都坐和望贏啦！
文：高洛文