冇得講，世界盃真係熱到爆，去到邊都梗有個識波之人喺左近，有啲仲真人不露相，估都估佢唔到嘅，好似滙豐工商業務一姐梁高美懿咁，一講起波興奮過好多波友，佢大大聲同華華講：「我識睇波嗰陣，你都未出世！」
愈睇愈愛阿根廷
梁太話，屋企成屋男人，得佢一粒女，所以細細個已經跟住老竇阿哥，睇西德嘅碧根鮑華，婚後老公又係標準球迷，世界盃又點會唔睇呢？之不過，人睇波佢睇波，梁太話自己唔會成場睇到唔眨眼，事關放咗工都仲有大把嘢要做，所以佢通常聽到啲人大叫、歡呼，先會衝出廳睇，咁就可以爭取時間做嘢，又唔會錯失入波時刻。
成日走出走入，咪好唔得閒？佢笑笑口話，係㗎，尤其法國對塞黑嗰場，入咗6個波，搞到佢成晚騰出騰入。梁太話，向來鍾意英格蘭，呢啲係情意結，球星就最冧碧咸，唔使講都係因為佢靚仔啦，但係睇咗幾場波之後，反而最愛阿根廷，隊波愈打愈好，最有冠軍相。
雖則世畀盃期間多咗人請假睇波，但4月先放完一個月大假嘅梁太，話自己唔會放假，事關人人顧住睇波，少咗好多人查詢，計落返工着數啲喎。
艾爾敦半夜來電
工作上，梁太同啲同事感情都幾好，好似離咗職嘅DavidEldon（艾爾敦）咁，三更半夜都會發個電郵嚟，問佢得唔得閒傾電話！
李華華