就快七．一，大大小小嘅回歸活動相繼出籠，咁慶祝自然要使錢，邊個畀？梗係叠水又愛國嘅商家企業啦！之不過，畀錢都要畀得精明，好似郭氏三兄弟揸Fit嘅新地咁，就揀咗中港兩地都有電視播放嘅「香港回歸9周年大型綜合晚會」，覆蓋層面咁大，賣廣告嘅話，費用一定唔少，主席郭炳湘當晚仲會做埋主禮人，呢鋪真係攞晒彩喇！
個晚會由阿爺嘅中央電視台、六叔嘅TVB，以及文匯報做搞手，明晚喺紅館舉行，除咗有天王天后級歌星，好似劉德華、陳奕迅、古巨基、陳慧琳等助陣之外，仲有大型舞台劇《風中少林》、《青藏高原》，同埋雜技表演《追炫》睇，門票分$50同$100，全部收益都會撥捐公益金。