碰到基金經理E，三句不離本行，問佢對電盈出售資產一事有乜意見，基金會唔會支持！基金E話：「我哋買股票為乜，為咗賺錢啫，電盈賣資產，睇報紙報道（《金融時報》話麥格理出七十三億美元，新橋出七十五億美元），價錢好好，對股東有利，我哋梗會投票支持。不過，呢單嘢會唔會去到特別股東大會呢？或者中方會嚇走麥格理與新橋噃，股東喊都無謂！」
當商業交易碰上政治交易，結果好難預測，基金E話：「如果你去某條街買舖，突然有人同你講，呢條街係我睇嘅，呢間舖你最好唔好掂，否則以後我哋冇偈傾，你會點諗呀？」為之𢱑頭，如果係咁，間舖頭變咗係可望不可即，業主冇權話事。業主股東惟有繼續收租，望天打卦。
基金E間公司係美國資本，當然夢想打入內地市場，但入去攞牌，打通關節，極不容易。基金E話佢哋在任何地方做生意，送禮畀人唔准超過一百美元；咁細眉細眼，喺大陸行唔通噃。基金E話有唔少外國公司索性請管理顧問/公關顧問，呢類顧問公司有個特點，就係主事人多數係高幹子弟，名校畢業，而且留過學，飲過洋水，特別適合洋人胃口。請顧問公司，畀十萬八萬美元顧問費，一天都光晒，外資去衙門，帶兩梳蕉就得。送禮物一百美元，開唔到數，付出顧問費十萬美元，開數濕濕碎啦，世界事就是如此奇妙。
基金E有位朋友係內地通，朋友初入行時跟老細，老細教佢如何在內地交收。交收甚麼？老細畀嚿銀紙佢，叫佢有時放喺某處櫃桶、某餐廳幾多號枱、某火車站邊個出口……朋友學咗好多交收學問，現已成為專家。不過呢套學問好難學，因為香港人點都睇過廉政風暴，做呢啲事起初真係唔多慣，唔似台灣商人咁如魚得水，但係久入鮑魚之肆，不聞其臭，慣咗之後，政治駕馭了商業，如無大勇氣，點敢企硬？